Vətən müharibəsində “ARANTV” onlayn televiziya əməkdaşlarının xüsusi rolu var
Məlumdur ki, 1991-ci ildə Azərbaycan Respublikası ikinci dəfə dövlət müstəqilliyini bərpa etdikdən sonra, bir çox milli-mənəvi dəyərlərə qayıdış mətbuat sahəsində də özünü göstərməyə başladı. Bu gün ölkəmizdə yüzlərlə mətbuat orqanı-qəzet və jurnal fəaliyyət göstərir və illər keçdikcə milli mətbuatımız daha da inkişaf edir. Hal-hazırda Azərbaycan mətbuatının ictimai maraqların qorunmasında, insanların informasiya ehtiyaclarının ödənməsində, ölkədaxili və bəşəri problemlərlə bağlı ümumi ictimai fikrin, milli mənlik şüurunun, vətənpərvərlik duyğularının, və s. formalaşmasında oynadığı rolun əhəmiyyəti olduqca böyükdür.
Bir anlığa təsəvvür edək ki, ölkəmizdə heç bir qəzet, jurnal, radio və televiziya fəaliyyət göstərmir. İnsanlar cəmiyyətdə və dünyada baş verən hadisələrdən necə xəbərdar ola bilər?! Bu baxımdan mətbuatın rolu əvəzsizdir.
Qeyd edək ki, Azərbaycan milli mətbuatı ötən illər ərzində çətin və şərəfli yollardan keçib. Əsası görkəmli maarifçi və publisist Həsən bəy Zərdabi tərəfindən qoyulan milli mətbuatımız, bu gün də önəmli rola və ictimai rəyə təsir göstərmək imkanına malikdir. Yəni, dördüncü hakimiyyət hesab olunan bu ictimai institutun Azərbaycanda dövlət və ictimai maraqların müdafiəsində özünəməxsus rolu var və bunu heç cür inkar etmək olmaz.
Hal-hazırda ölkəmizdə fəaliyyət göstərən və təsisçisi Vüsal Bayramov olan ARANTV.az onlayn televiziya media qurumu bu gün insanların informasiya ehtiyaclarının ödənməsində, ümumi ictimai fikrin və milli mənlik şüurunun formalaşmasında, vətənpərvərlik duyğularının təbliğində və s., olduqca böyük rol oynayır.
Bir anlığa yada salaq ki, Vüsal Bayramovun təşkilatçılığı ilə ARANTV.az onlayn televiziya redaksiyasının əməkdaşları erməni vandalizminə qarşı həyata keçirilən 44 günlük Vətən savaşında ciddi iş rejimində çalışıb, əsl vətənpərvərlik duyğusu nümayiş etdiriblər. Belə ki, əməkdaşlar redaksiyanın fəaliyyət göstərdiyi Bərdə rayon ərazisinə döyüş bölgələrindən gətirilən şəhidlərlə bağlı lazımi çəkilişlər həyata keçirib, onların hüzr mərasimlərində iştirak ediblər. Həyata keçirilən çəkilişlər həm redaksiyanın arxivində saxlanılır, həm də şəhid ailələrinə çatdırılır.
Bundan əlavə, düşmən ölkə tərəfindən Bərdə şəhəri ərazisinə atılan raket zərbələrinin yaratdığı dağıntılarla bağlı çəkilişlər həyata keçiriblər, işğalçı ölkənin əsl xislətinin dünyaya çatdırılmasında mühüm rol oynayırlar. Şəhidlərin il yas mərasimlərində iştirak edib, lazımi reportajlar hazırlayırlar. Aranmedia qəzetində və jurnalında şəhidlərin keçdikləri döyüş yollarından, onların misilsiz qəhrəmanlıqlarından bəhs edən məqalələr dərc edib, geniş ictimaiyyətin baş verənlərlə bağlı məlumatlı olmasına səbəb olurlar.
ARANTV.az onlayn televiziya redaksiyasının əməkdaşları hər kəsdə, ələlxüsus gənclərdə vətənpərvərlik əhvali-ruhiyyəsinin artmasında, onlarda Vətənə sevgi hissinin və xalqa bağlılıq duyğusunun çoxalmasında, düşmənə qarşı nifrət hissinin təbliğ olunmasında mühüm rol oynayırlar.Unutmaq olmaz ki, redaksiya əməkdaşları Bərdə şəhəri ərazisində baş verənlərlə bağlı lazımi arxivin ərsəyə gətirilməsinə lazımi köməkliklərini də göstərirlər.
Bəli, bu yöndə atılan addımların hər biri dövlətimizin, xalqımızın ümumilli maraqlarına cavab verən addımlar olur ki, bu da hər zaman alqışlanmalıdır. ARANTV.az onlayn televiziyanın əməkdaşları ayrı-ayrı ictimai təşkilatlar, idarə və müəssisələr tərəfindən diplomlarla, fəxri fərmanlarla təltif olunublar. Düşünürük ki, vətənin çətin anlarında istənilən bir şəxsin, yaxud da hansısa qurum əməkdaşlarının kollektiv şəkildə ortaya qoyduqları iradə heç zaman unudulmur, hər zaman layiq olduğu qiymətini də alır.
Çünki, tarix unutmur, tarixdə heçnə unudulmur.
