Hər dəfə 31dekabr ilin son günü- Dünya Azərbaycanlılarının həmrəylik günü gələndə bir el nümunəsini zümzümə edirəm: “El bir olsa, dağ oynadar yerindən, Söz bir olsa, zərbi kərən sındırar”. O gün el bir oldu. O gün elin zərbi kərən sındırdı. İllərin sınağından çıxmış bu el deyimi öz təsdiqini tapdı.Tarixin ən çətin anında el birlik nümayiş etdirdi. 31 dekabr Azərbaycan xalqının tarixində ən yadda qalan, ən şərəfli günlərdən biri – Dünya Azərbaycanlılarının Həmrəyliyi Günü kimi tarixə daxil oldu və artıq 30 ildir ki, bu tarixi günü bayram edirik. Məlumdur ki, bu günün əsası 1989-cu ildə Azərbaycanın Naxçıvan Muxtar Respublikası ilə İranın Azərbaycan sərhədinin (SSRİ – İran sərhəddinin) dağıdılması ilə qoyulub. Uzun zaman bir-birinə həsrət qalan Azərbaycan millətinin Arazın hər iki sahilində sərhəd yürüşü – Şimali və Cənubi Azərbaycan arasındakı sərhəd dirəklərini yıxması, o taylı – bu taylı millətin həftələrlə Araz qırağında birləşmək şüarı ilə gecə-gündüz çırpınması el birliyinin-həmrəyliyin əslində azərbaycanlıların canında, qanında olduğunu dünyaya bəyan etdi. Dünyaya səpələnmiş azərbaycanlıların bir can olduğunu, bir millət olduğunu dünya çapında bir daha canlandırmağa nail oldu və Azərbaycanı bütövləşdirmək cəhdlərinin hədər getmədiyini əyani sübut etdi. Bütün dünyada Həmrəylik günü bu birləşmək istəyinin bir simvolik nişanı kimi tanındı.
Bu qürurverici gün Ulu öndər Heydər Əliyevin azərbaycançılıq ideyasının parlaq təzahürüdür. 1991-ci ilin 16 dekabrında Naxçıvan Muxtar Respublikası Ali Məclisinin sədri Heydər Əliyev dünya Azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəyliyi Günü elan etdi. Ulu öndərin uğur qazanan təşəbbüsləri sırasında Həmrəylik günü dünya azərbaycanlıları tərəfindən alqışlandı və zaman sübut etdi ki, harda yaşamasından asılı olmayaraq ürəyi Azərbaycan üçün-Vətən üçün döyünən insanlara məsafələr əngəl deyil. Deyirlər, Vətən torpağını çəkmələrin dabanlarında qürbətə aparmaq olmaz, amma bu sevgini qürbət ellərdə ürəyin infarktında yaşamaq olar. Bu gün Dünya Azərbaycanlıları ulu Şəhriyar demiş, “ayrı düşən el ilə” qovuşdu. Və rəsmən Ulu öndər Heydər Əliyevin bu təşəbbüs mərkəzi hakimiyyətin də dəstəyini qazanaraq bütün Azərbaycanlıların bayram gününə çevrildi.
Artıq neçə illərdir ki, bu möhtəşəm gün-Dünya Azərbaycanlılarının Həmrəyliyi Günü məsafələri aşaraq dünyanın 70-dən çox ölkəsində məskunlaşan Azərbaycan millətinin birliyinin rəmzinə çevrilib. İndi milyonlarla azərbaycanlı öz soydaşları ilə əlaqələr qurur, bu gün bir zərurət və mənəvi ehtiyaca ehtiyaca çevrilərək birlik və həmrəyliyinmizin daha da möhkəmləndirilməsində mühüm rol oynayır. Dünya Azərbaycanlılarının Həmrəylik gününün qeyd edilməsi bu il daha möhtəşəm və yaddaqalandır. Azərbaycan xalqının lideri, dünya şöhrətli Prezidentimiz İlham Əliyevin ətrafında sıx birləşən xalqımız öz tarixi qələbəsi-Zəfəri ilə bütün dünyaya bir daha birliyimizi nümayiş etdirdi. Uzun illər idi ki, haqqa göz yuman, ədalətsizliyə dözən dünya “Qarabağ-Azərbaycandır!” nidasını birmənalı olaraq qəbul etmək məcburiyyətində qaldı.
Həmrəylik gününü Azərbaycan diasporu da ən mühüm bayram olaraq qeyd edir. Bu günü- həmrəylik gününü hətta milliyyətcə azərbaycanlı olmayıb, lakin Azərbaycanda doğulub boya-başa çatmış, bu cənnət diyarın- Azərbaycanın havasını, suyunu dadmış, duz-çörəyini, düz çörəyini kəsmiş Azərbaycan əsilli diaspor nümayəndələri də qeyd edirlər. Bu gün-dekabrın 31-i hər bir azərbaycanlı üçün birlik, həmrəylik günüdür. Bu olduqca qürurvericidir. Dünya azərbaycanlılarının həmrəyliyi, onların təşkilatlanması Ümummilli Liderimiz, dahi şəxsiyyət Heydər Əliyevin uzaqgörənliyinin nəticəsi, davamlı olaraq isə Azərbaycan xalqını öz ətrafında birləşdirməyə və xalqa Zəfər gününü yaşatmağa qadir olan Prezidentimiz İlham Əliyevin uğurlu daxili və xarici siyasətinin nümayişidir. Elə bu məqamda Ümummilli Liderimiz 31 Dekabr Dünya Azərbaycanlılarının Həmrəylik Günü münasibətilə xarici ölkələrdə yaşayan soydaşlarımıza müraciətindən bir sitatı xatırlamaq istərdim: “Dünya Azərbaycanlılarının Həmrəylik Gününün dövlət bayramı kimi qeyd edilməsi xalqımızın milli azadlıq mübarizəsinin məntiqi nəticəsi olaraq artıq xoş ənənəyə çevrilmişdir. Qədim və zəngin tarixə malik olan Azərbaycan xalqının dirçəlişini, tərəqqisini və milli birliyini əks etdirən, onu müstəqil dövlətçilik uğrunda müqəddəs və məsuliyyətli mübarizəyə səfərbər edən həmrəylik günü hər bir azərbaycanlı üçün inam və ümid anıdır. Hal-hazırda dünyanın müxtəlif ölkələrində milyonlarla soydaşımız yaşayır, işləyir, fəaliyyət göstərir. Buna baxmayaraq, onların milli-mənəvi varlığını yaşadan yeganə bir dövlət var. Bu, müstəqil, suveren Azərbaycan Respublikasıdır. Dünya azərbaycanlılarının birliyi və həmrəyliyi ideyasının əsasını da məhz Azərbaycan dövlətçiliyinə, xalqımızın dilinə, dininə, milli-mənəvi varlığına və ümumbəşəri dəyərlərə hörmət, onların daim qorunmasına, yaşamasına qayğı təşkil edir”.
Bu günün tarixiliyini Azərbaycan Respublikasının Prezidenti İlham Əliyev isə belə qeyd etmişdir: “Dünya azərbaycanlılarının həmrəyliyi və birliyi üçün Ulu Öndər çox böyük səylər göstərmişdir. Hələ 1991-ci ildə Naxçıvanda onun təşəbbüsü ilə 31 Dekabr Dünya Azərbaycanlılarının Həmrəylik Günü” kimi elan edilmişdir. Bu gün hər bir azərbaycanlı Hərəylik gününü qeyd edərkən heç şübhəsiz ki, ulu öndərin “Hər bir insan üçün onun milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən azərbaycanlıyam!” ifadəsini də hörmət və ehtiramla xatırlayır.
Gününüz mübarək, əziz soydaşlarımız.
Azərbaycançılığımız var olsun!
Azərbaycan naminə birliyimiz daimi olsun!
Məsafələr heç vaxt əngəl olmasın!
Camalova Rumiyyə İnşad
ADPU- nun müəllimi.
