Lal ol! Danışma!
Hakimiyyətdə olduqları müddətdə hay-küyləri ilə özlərini iş görən kimi göstərən AXC-Müsavat cütlüyünün tör-töküntülərinin lazım olmayan məqamlarda istifadə etdikləri metod
İqtidarda olduqları qısa müddətdə Azərbaycanı iflic vəziyyətinə salan, ölkədə özbaşınalıq yaradan, xalqa məxsus dövlət sərvətlərini satıb, şəxsi büdcələrini zənginləşdirən Xalq Cəbhəsi-Müsavat cütlüyünün xəyanətkarlarının əli silahlı quldurları insanları incidir, işgəncələr verirdilər. Özlərini demokrat adlandıran bu ünsürlərin səriştəsizlikləri üzündən çörək qıtlığı belə yaranmışdı. AXC-Müsavat cütlüyü dövründə xarici səfirlər prezidentin kabinetinin qapısını ayaqları ilə açırdılar, adı dövlət başçısı olsa da, idarəçilik təcrübəsi olmayan başçıya göstərişlər verirdilər. Xəzinəsi boş olan respublikaya
kredit verən belə yox idi. Qanunların işləmədiyi, insan hüquqlarının qorunmadığı ölkədə oğurluq, talançılıq baş alıb gedirdi. Torpaqların Ermənistan tərəfindən işğalını unudan «demokratların» səbatsızlığı üzündən ölkədə yaranan qarşıdurma vətəndaş müharibəsinin başlanması üçün qığılcım idi. Hakimiyyət daxilindəki çəkişmələr, kreslo uğrunda davam edən intriqalar Azərbaycanın varlığını, xalqın taleyini arxa plana keçirmişdi.
O dövrdə Azərbaycanda baş verən hərc-mərcliyi «Kəlbəcər 1993-cü ilin aprel ayında işğal altına düşmüşdü. O vaxt hakimiyyətdə olan AXC-Müsavat xəyanətkar cütlüyü Kəlbəcəri nəinki müdafiə etmirdi, hətta Kəlbəcəri qurban verməyə hazır idi, bunu da etdi. Ondan əvvəl Laçın və Şuşa işğal altına düşdü və Kəlbəcərin işğal altına düşməsi ermənilərin planlarında idi. AXC-Müsavat hakimiyyəti talançılıqla, soyğunçuluqla məşğul olurdu, orduya, ordu təchizatına fikir vermirdi, bu bölgədə yaşayan insanlara fikir vermirdi, onlara biganə yanaşırdı və Kəlbəcər işğal altına düşdü. Beləliklə, Ermənistan öz arzularına, çoxəsrlik arzularına çatdı ki, Qarabağla, – o zaman «Dağlıq Qarabağ»” adlandırılırdı, – bu bölgə ilə Ermənistan arasında canlı bağlantı olsun. Kəlbəcər, Laçın dağları bu bağlantının qabağını almışdı. Kəlbəcərin itirilməsi strateji nöqteyi-nəzərdən böyük faciə idi. Eyni zamanda, burada yaşayan insanların bir çoxu ermənilər tərəfindən öldürülüb, buradan çıxa bilən insanların bir çoxu Murov dağlarında donub və həyatlarını itirib» sözləri ilə xarakterizə edən Prezident İlham Əliyevin vurğuladığı kimi, insanların taleyi o dövrün iqtidarı üçün önəmli deyildi. Kəlbəcərin işğalından sonra Ermənistanla əlaqəsini kəsən Türkiyədən fərqli olaraq « cəbhəçilər» işğalçı ölkəyə yanacaq satmaq klanlarını dayandırmadılar
Sadalanan bu faktları əbəs yerə xatırlatmadıq. Şuşanın, Laçının, Kəlbəcərin Ermənistan tərəfindən işğalı üçün şərait yaradan, torpaq təəssübünü, vətəndaşlıq mövqeyini itirən AXC-Müsavat iqtidarının tör-töküntüləri Azərbaycanın Vətən müharibəsində qazandığı Qələbəni nəinki susqunluqla qarşıladılar, hətta ermənilər kimi məyus oldular. İşğaldan azad olunan torpaqlarda aparılan bərpa-quruculuq işləri, Ağalıya qayıdış belə onların itirilmiş vicdanlarını oyatmadı.
Amma Azərbaycanın əleyhinə danışmaq lazım gələndə səsləri ucadan eşidilir. Bütün dünyanın, qüdrətli dövlətlərin ölkəmizin uğurlarını etiraf etdiyi, əməkdaşlıq münasibətlərinin genişləndiyi indiki zamanda belə Azərbaycan əleyhinə təxribatlarından əl çəkmirlər. AXCP sədri Əli Kərimlinin təxribat maşını olan xarici ölkələrdəki antimilliləri «islahatçı sədrin» göstərişlərinə uyğun «qara piar»larını davam etdirirlər.
AXC- Müsvat iqtidarı dövründə dünyadan təcrid olunmuş dövlət kimi tanınan Azərbaycan indi Prezident, Ali Baş Komandan İlham Əliyevin iradəsi, qətiyyəti sayəsində siyasi, iqtisadi platformaya çevrilib. Respublikamızda keçirilən biri-birindən əhəmiyyətli tədbirlərdə, konfranslarda iştirak edən xarici qonaqların heyrətlə izlədikləri Azərbaycan reallıqları antimilli ünsürlərə çatmır. Buna görə də xarici ölkələrdə onları yemləyənlərin əlində vasitə olan milli xəyanətkarların sözlərinə əhəmiyyət verilmir. 1993-cü ildə Ermənistana təhvil verdikləri, İkinci Qarabağ müharibəsində Ali Baş Komandan İlham Əliyevin başçılığı ilə Milli Ordumuz tərəfindən azad edilən Kəlbəcərin son günlərdə davamlı atəşə tutulmasını da ermənisayaq qarşılayan Əli Kərimli kimi onun himayəsində olan «Milli Şura»nın antimilliləri yenə də «Lal ol! Danışma!» siyasətlərinə sadiqdirlər.
Əslində onların danışmasına ehtiyac da yoxdur. Prezident İlham Əliyevin ətrafında birləşən Azərbaycan xalqının dünyaya yayılan gur səsi müqabilində belə xəyanətkarlara əhəmiyyət verən olmadığı kimi, dediklərinə də inanan yoxdur. Bu gün bütün dünya dövlətləri Azərbaycanla əməkdaşlıqda daha çox maraqlıdır. Nəinki belə satqınların yalanlarını dinləməyə. Qalib Milli Ordumuzun rəşadətinin dünyada heyrətlə izlənildiyi bir məqamda erməniləri dəstəkləyən antimillilərin danışması ilə susmasının fərqi yoxdur. Buna görə də Əli Kərimlinin formalaşdırdığı xəyanətkarların varlığı ilə yoxluqları da bilinmir.
