İkinci Qarabağ müharibəsində xalqımızın mərd övladları Vətən torpaqlarının yağı tapdağından azadlığı naminə misilsiz fədakarlıq göstərdilər. Lənkəran rayonunun Şıxəkəran kəndində anadan olan Murad Vasif oğlu Abbasov da doğma Azərbaycanın müqəddəsliyini canından əziz tutmaqla şəhidlik zirvəsinə ucaldı. Beləcə, Vətən üçün doğulan Lənkəran elinin igid oğlu 22 yaşında yeni tarix yazmaqla bizlərə örnək oldu. İndi olduğu kimi, qərinələr keçəcək, gələcək nəsillər də Muradın adını qürurla çəkəcək…
2015-ci ildə qohum-qonşu öz vətənpərvər, ürəyi sevdalı oğlunu ordu sıralarına yola salanda o, deyir: “Darıxmayın, başınızı uca edib, sağ-salamat evə dönərəm.” Belə də olur. Vətənə böyük sevgisi, düşdüyü cəbhə bölgəsində nümunəvi xidməti əsgər Murada başucalığı gətirir. Bütün hərbi təlimlərdə fəal olur ki, məqamı gələndə döyüş meydanında düşməndən qisasını ala bilsin. 1il 6 aylıq əsgərlik həyatı başa çatanda: ”Dığaların ömrünə az qalır. Onlardan alacağım qisas gününü gözləyirəm. Yağının ilan başını əzəndə mən sizin yanınızda olaram”,-deyib hərbi hissədən çıxır.
Vətənini, xalqını ürəkdən sevən Murad bir müddət el-obası üçün çalışır. Gördüyü işə görə təmənna ummur. Xeyirxah əməlləri, ülvi, humanist keyfiyyətləri cəmiyyətdə ona yalnız hörmət qazandırır. Vətən torpaqlarını azad görmək istəyi, yağıya nifrət hissi bir qayda olaraq Muradı mübarizə meydanına səsləyir. Odur ki, 2020-ci il sentyabr ayın 27-də İkinci Qarabağ müharibəsi başlayanda ürəyi Vətənə sevdalanan gənc tərəddüd etmədən cəbhəyə yollanır.
Bəli, silaha sarılan Murad bir başa səngərə girib erməni dığalarla haqq savaşımıza başlayır. Müharibə meydanını hər dəfədə qələbə ilə tərk edir. Cəbrayılın, Qubadlının azadlığı naminə sözün əsl mənasında tarix yazır. İgid, cəsur döyüşçü yağılara endirdiyi sarsıdıcı zərbələrlə onların kabusuna çevrilir. Oktyabrın 23-ü də daxil olmaqla neçə-neçə erməni əsgərinin, erməni tankının axırına çıxır. Ağır döyüşlərin birində şəhid olsa da, Vətən naminə tökdüyü qan, 30 il əsarətdə qaldığı torpağın sinəsində qeyrətinə tapındığı doğma Azərbaycanımızın üç rəngli qələbə bayrağına dönür. Bu, igidlik Murad Abbasova isə əbədi bir ömür qazandırır.
İndi adı xalqın dilində qəhrəmanlıq simvoluna dönən Murad Abbasovun müharibədə göstərdiyi şücaəti nəzərə alaraq dövlət də öz növbəsində onu “Vətən uğrunda”, Cəbrayılın və Qubadlının azadlığına görə medallarına layiq görübdür.
Zəfər Orucoğlu,
Azərbaycan Jurnalistlər Birliyinin üzvü
