Xətai rayonunda Uşaqların Beynəlxalq Müdafiəsi Gününə həsr edilmiş konsert proqramı təşkil edilib – FOTO/VİDEO
Azərbaycanda dövlətin uşaqlarla bağlı siyasətinin formalaşması ümummilli lider Heydər Əliyevin adı ilə bağlıdır. “Uşaqlar bizim gələcəyimizdir” deyən ulu öndər tərəfindən bu sahədə mühüm qanunvericilik və institusional tədbirlər görülüb, həmçinin respublikamız bir çox konvensiyalara, o cümlədən BMT-nin “Uşaq hüquqları haqqında” Konvensiyasına qoşulub.
2009-cu il Azərbaycanda “Uşaq ili” elan olunub, müvafiq normativ hüquqi baza təkmilləşdirilib, dövlət proqramları, “Azərbaycan Respublikasının Uşaqlara dair 2020–2030-cu illər üçün Strategiyası” təsdiq edilib, uşaqların hərtərəfli inkişafı üçün hər cür şərait yaradılıb.
31 may 2023-cü ildə “Heydər Əliyev ili” çərçivəsində “1 İyun-Uşaqların Beynəlxalq Müdafiəsi Günü” manasibətilə Xətai rayonu, Heydər Əliyev adına istirahət parkının amfiteatr səhnəsində Xətai rayon İcra Hakimiyyətinin və Yeni Azərbaycan Partiyasının (YAP) rayon təşkilatının təşəbbüsü ilə rayonda fəaliyyət göstərən uşaq musiqi məktəblərinin konsert proqramı təşkil olunub.
Tədbirə rayon İcra Hakimiyyətinin başçısı Rafiq Quluyev, YAP Xətai rayon təşkilatının sədri Vüqar Rəhimzadə, rayon hüquq-mühafizə orqanlarının rəhbərləri, şəhid və qazi övladları, həmçinin digər uşaqlar da qatılıblar.
Konsertdə Xətai rayonunda fəaliyyət göstərən uşaq musiqi məktəblərinin istedadlı yetirmələri bir-birindən maraqlı, şən musiqi və rəqs nömrələri təqdim ediblər.
Böyük coşqu və vətənpərvərlik əhvali-ruhiyyəsi ilə keçən konsert proqramı sakinlər, xüsusən də balacaların qəlbinə sevinc, üzünə təbəssüm gətirib.
Həmçinin, Xətai rayon İcra Hakimiyyətinin təşkilatçılığı ilə əlamətdar gün münasibətilə “McDonald’s” restoranında şəhid övladları üçün daha bir bayram şənliyi təşkil olunub. Tədbirdə rayon İcra Hakimiyyətinin Vətən Müharibəsi İştirakçıları və Şəhid Ailələri ilə İşin Təşkili şöbəsinin müdiri Anar Məmmədov uşaqların bayramını təbrik edib, onlara xoş arzularını çatdırıb.
Bildirilib ki, respublikamızın müstəqilliyi və ərazi bütövlüyü uğrunda şəhid olmuş Vətən övladlarının xatirəsi xalqımız tərəfindən daim əziz tutulur.
Sonra şəhid övladları üçün əyləncəli oyunlar, səhnəciklər nümayiş olunub.
Tədbirdə qeydə alınan görüntüləri təqdim edirik:
