Fitr bayramı ilahi mükafatın alınması günüdür – İlahiyyatçı/ÖZƏL
Artıq “on bir ayın sultanı” mübarək Ramazan ayının son günləri yaşanır. Ramazan bayramı, həm də Fitr bayramı adlandırılır və onun özünəməxsus əməlləri var. Ramazan ayını ibadət, oruc, raz-niyaz, münacat, təvəssül və zikrlə keçirib Fitr bayramına daxil olmaq bir mömin üçün həqiqi mənada bayramdır. Ramazan (fitir) bayramı namazının əhəmiyyəti də ən çox diqqət çəkir.
Fitr bayramı müsəlmanlar üçün şadlıq və sevinc günü, ilahi mükafatın alınması günüdür
Mövzu ilə bağlı Sumqayıt Cümə məscidinin imamı, ilahiyyatçı Hacı Gülağa İsmayılov “İki sahil”ə bildirib ki, Fitr bayramı müsəlmanlar üçün əhəmiyyətli hesab edilən günlərdəndir, çünki bir aylıq oruc, ibadət və duadan sonra onlar ilahi mükafat əldə etmək üçün hazırlaşırlar: “Beləliklə, bu gün bir tərəfdən, şadlıq və sevinc günüdür və hər bir müsəlman vəzifəsini yerinə yetirdiyi üçün sevinir, digər tərəfdən, ilahi mükafatın alınması günüdür. İnsan bir aylıq əməllərin hansı həddə qəbul edildiyini bilmədiyi üçün iztirab və narahatlıq halında olur. İmam Baqir (ə) Allahın rəsulundan (s) belə nəql etmişdir: “Şəvval ayının ilk günü yetişdiyi zaman, nida edən (Mələk) belə səslənər: “Ey möminlər! Öz mükafat və hədiyyələrinizi almaq üçün tələsin!” Sonra imam Baqir (ə) buyurdu: “Allahın hədiyyə və mükafatları padşahların mükafatı kimi deyil, yəni Allahın mükafatı həddən artıq böyük və mənəvi, ibadət və itaətin qəbul edilməsi və ilahi razılıqdır. İmam sözlərinin sonunda təkid edərək belə buyurur: “Şəvval ayının ilk günü hədiyyələr almaq günüdür.”
Məsləhətdir ki, fitrә zәkatı verәndәn sonra bayram namazı qılınsın
İlahiyyatçı bildirib ki, şəvval ayının ilk günü üçün mühüm əməllər qeyd edilir: “Fitr bayramında müstәhәbdir ki, gün qalxandan sonra bir şey yeyib, fitrә zәkatı verәndәn sonra bayram namazı qılsınlar. Bayram namazından öncə qüsl vermək, namazdan əvvəl və sonra dua kitablarında verilmiş dualardan oxumaq bu günün bəyənilən əməllərindəndir. Fitr bayramı namazı iki rәkәtdir. Birinci rәkәtdә Hәmd-Surәdәn (Fatihə və hər hansı surə, məsələn İxlas surəsi) sonra beş tәkbir deyilmәlidir, amma hәr tәkbirdәn sonra bir qunut tutulmalıdır. Beşinci qunutdan sonra isә bir tәkbir deyib (6-cı təkbir olur) rüku vә iki sәcdәni yerinә yetirib ayağa qalxmalı, ikinci rәkәtdә isә (Hәmd-Surәdәn sonra) dörd tәkbir deyilmәli, hәr tәkbirdәn sonra bir qunut tutub beşinci tәkbirdәn sonra rüku, sәcdәni yerinә yetirib namazı qurtarmaq lazımdır.”
Fitr bayramı namazının ən çox təkid olunan duası
Hacı Gülağa İsmayılov vurğulayıb ki, bayram namazının xüsusi surəsi yoxdur: “Amma yaxşı olar ki, onun birinci rəkətində Şəms surəsi, ikinci rəkətində Ğaşiyə surəsi oxusun və yaxud birinci rəkətdə “Əla surəsi, ikinci rəkətdə Şəms surəsi oxunsun. Fitr bayramı namazının qunutunda dua oxunsa, kifayәtdir. Amma ən çox təkid olunan dua budur: “Allahummə əhləl kibriyayi vəl əzəmə və əhləl cudi və-cəbərut və əhləl əfvi vər-rəhmə və əhlət-təqva və məğfirə. Əsəlukə bihəqqi hazəl yəumi əlləzi cəəltəhu lilmusliminə ida Və İl Muhəmmədin səllallahu ələyhi və alih zuxrən və şərəfən mə kəramətən və məzida. Ən tusəlliyə əla Muhəmmədin və ali Muhəmməd. Və ən tudxiləni fi kulli xəyrin ədxəltə fihi Muhəmmədə və ali Muhəmməd. Və ən tuxricəni min kuli suin əxrəctə minhu muhəmmədən və ali Muhəmməd. Sələvatukə ələyhi və alih. Allahummə inni əsəlukə xəyrə ma səələkə bihi ibadukəl muxləsun və əuzu bikə mimmastəfzu minhu ibadukəl muxləsun” (Duanın əzbər bilməyənlər mətnini kağızdan oxuya bilərlər). Müstәhәbdir ki, Fitr bayramı namazında qiraәt ucadan olsun.”