Bakı Baş Gömrük İdarəsinin, Abşeron, Xocasən, İpək-Yolu və digər gömrük postlarının əməkdaşları iş vaxtından əlavə xidmətə çağrılmalarından, istirahətin verilməməsi və digər məsələlərdən şikayətçidirlər. Bu barədə onlar Mia.az-a müraciət ediblər.
Narazı əməkdaşlar bildiriblər ki, iş saatı 18.00-da bitməli olsa da, yüklərin qəbulu və yerləşdirilməsi, müayinəsi gecə saat 01:00-02:00-a qədər davam edir:
“Bu kimi hallar artıq 1 ilə yaxındır ki, davam edir. İşçilərin əmək hüquqlarının pozulması halları onların “WhatsApp” qruplarında və Bakı Baş Gömrük İdarəsinin sistemində açıq-aşkar görünür”.
Onlar qeyd ediblər ki, bu hallar İpək-Yolu Gömrük Postunda daha çox baş verir:
“Gecə saat 02:00-da yüklərin daşınması və yerləşdirilməsi bitsə də, həmin saata qədər işləyən işçinin səhər 09:00-da yenidən işdə olması tələb edilir. Məsələ ondadır ki, əlavə iş saatlarına görə hər hansı ödəniş də verilmir”.
Hətta bu məsələlərlə bağlı bir müddət əvvəl Dövlət Gömrük Komitəsinin sədri, general-leytenant Şahin Bağırov tərəfindən Bakı Baş Gömrük İdarəsinin rəisi Elmir Ramazanova tapşırıq verdiyi də bildirilir:
“Həmin tapşırıqdan sonra işçilər arasında növbəli sistem qurulsa da, bu, cəmi 2 həftə davam edib. Hazırda işçilər yenə də ağır rejimdə çalışırlar. Mart ayındakı qeyri-iş günlərində də analoji ağır iş rejimi davam edib”.
Məsələ ilə bağlı Dövlət Gömrük Komitəsindən Musavat.com-un sorğusuna cavab olaraq bildirilib ki, Bakı Baş Gömrük İdarəsində xidmət növbəlilik prinsipi əsasında təşkil edilir:
“Biznes subyektlərinin müraciətləri əsasında təqdim edilmiş bəyannamələrə uyğun olaraq gömrük rəsmiləşdirilməsinin sürətləndirilməsi, proseslərin davamlılığının təmin edilməsi, sahibkarların vaxt və vəsait itkisinin qarşısının alınması məqsədilə Dövlət Gömrük Komitəsinin tabeliyindəki qurumlarda, o cümlədən Bakı Baş Gömrük İdarəsində xidmət növbəlilik prinsipi əsasında təşkil edilir”.
