Yumurta zülal, A, D, B12 vitaminləri, dəmir, fosfor və lecitinin təbii mənbəyidir. Bu məhsul qaynadılmış, qızardılmış, salatlarda, desertlərdə və isti yeməklərdə geniş istifadə olunur. Ancaq hər kəs üçün uyğun deyil.
Bəzi insanlar üçün yumurta sağlamlıq baxımından təhlükə yarada bilər.
1. Yumurta allergiyası
Bu, xüsusilə uşaqlarda rast gəlinən ən geniş yayılmış qida allergiyalarındandır. Buraya dəri səpgiləri və qızartı, ödem və nəfəs almaqda çətinlik, ağır hallarda isə anafilaktik şok aiddir.
Allergiya həm yumurtanın ağı, həm də sarısı ilə bağlı ola bilər. Bu halda yumurta və onun tərkibli bütün məhsullar tamamilə rasiondan çıxarılmalıdır.
2. Yüksək xolesterin səviyyəsi
Yumurta sarısında təxminən 200 mq xolesterin var. Hərçənd müasir araşdırmalar qida xolesterinin təsirinin daha mürəkkəb olduğunu göstərir, ürək-damar xəstələri və aterosklerozlu şəxslərə həftədə 2-3 yumurtadan artıq yeməmək tövsiyə olunur. Belə hallarda yalnız ağ hissədən istifadə etmək məsləhətdir.
3. Qaraciyər və öd kisəsi problemləri
Qaraciyər xəstəlikləri, pankreatit və ya öd daşı zamanı yumurtanın sarısı orqanizmə əlavə yük ola bilər. Xəstəliyin aktiv fazasında həkimlər yumurtadan tamamilə imtina etməyi, yalnız mütəxəssis nəzarətində yumurta ağından istifadə etməyi tövsiyə edirlər.
4. Salmonella riski
Yaxşı bişirilməmiş yumurta salmonella bakteriyası ilə yoluxma riski daşıyır. Bu, xüsusilə uşaqlar, yaşlılar, hamilə qadınlar və immuniteti zəif olan insanlar üçün təhlükəlidir. Bu səbəbdən yumurtaları tam termiki emal edin və çiy halda istifadə etməyin (məsələn, xəmir və ya mayonez hazırlığında). (lent.az)
