Nəsiminin məzarını köçürmək istəyənlər “nəbz yoxlaması” aparır – Sensasion iddia
“İmadəddin Nəsiminin məzarının Azərbaycana köçürülməsi ilə bağlı xəbər ictimai rəydə yoxlama məqsədilə ortaya atılıb. Çunki belə bir hərəkət üçün hazırda hər hansı zərurət və ya ehtiyac yoxdur”.
ARANTV.AZ bildirir ki, bu barədə dini məsələlər üzrə ekspert Kənan Rövşənoğlu feysbuk hesabında yazıb.
Ekspert qeyd edir ki, qəbir köçürülməsi iki halda baş verə bilər:
“Birinci, cəsəd o yerə əmanət olaraq basdırılanda, ikincisi, məzara real təhlükə olduqda. Birinci nümunə Hüseyn Cavid idi. Sibirdə sürgündə dəfn edilmişdi, Azərbaycana gətirilməsi məntiqli, hətta lazımlı idi. Yaxud da İstanbulda məcburi sürgündə dünyasını dəyişən Camaləddin Əfqaninin nəşini Əfqanıstan şahı 50-ci illərdə Kabula apardı. Çünki Əfqani İstanbulda həbsdə dünyasını dəyişmişdi.
İkincisi qəbir üçün təhlükə olanda, 10 il əvvəl Türkiyə hökuməti Süleyman Şahın qəbrini, terror təhlükəsi səbəbilə köçürdü.
Bilindiyi kimi, Nəsiminin məzarı üçün bu iki versiyadan heç biri uyğun deyil. 600 ildir Nəsimi edam edildiyi Hələbdə dəfn olunub və məzarı ehtiramla qorunur. Məzar Hələbin mərkəzində, Hələb qalasının yaxınlığında yerləşir, onun yerləşdiyi küçə də Nəsimi küçəsi adlanır. Küçə kiçik olsa da əsasən qədim tarixi dini abidələr və sufi təkkələri yerləşir.
2008-ci ildə həmin küçəni və qəbri ziyarət edəndə evlərin birində sufi məclisinin şahidi olmuşam.
Digər tərəfdən, qəbir üçün bu dövrdə, hətta Hələb müharibə meydanına çevriləndə, şəhərdə təkfirçi qruplar at oynadanda belə Nəsiminin nəzərinə təhlükə olmayıb. Ancaq məsələn, Raqqa Məhəmməd Peyğəmbərin (s) səhabəsi Əmmar Yasirin məzarını partlatdılar.
Ancaq Nəsimi üçün elə təhlükə olmadı, çunki Nəsiminin Hələbdə əqrəbaları olduğunu iddia edən adamlar yaşayır, üstəlik türkmən camaatı amili var.
Hətta son aylarda mən Hələbdəki türkman qardaşlardan, Türkmən TV və Yurt fm radiosunda Murtaza Karaalidən xahiş etdim, məzarın fotolarını çəkib göndərsin. Onlar da sağ olsun, Nəsimiyə veriliş həsr elədilər”.
Kənan Rövşənoğlu sonda vurğulayıb ki, indiki halda Nəsiminin məzarının Hələbdə olması Azərbaycan və Suriya, əsas da türkman camaatı arasında mənəvi bağların qorunması baxımından daha vacibdir, nəinki köçürülməsi.
“Ona görə də, düşünürəm ki, Nəsiminin məzarının köçürülməsi ilə ilə bağlı ciddi bir iş ola bilməz, sadəcə kimlərsə bu mövzuda nəbz yoxlaması edir”,-deyə ekspert qeyd edib.
Xatırladaq ki, böyük şair və mütəfəkkir İmadəddin Nəsiminin məzarının Suriyadan Azərbaycana gətiriləcəyi ilə bağlı məlumat yayılıb. Məsələ ilə bağlı Suriyaya ilkin müraciət olunduğu da iddia edilir.
Lakin bu addım Azərbaycan ziyalılarının əksəriyyəti tərəfindən birmənalı qarşılanmayıb və ciddi tənqidlərə səbəb olub.
