Qarşılıqlı faydalı əməkdaşlıq üçün böyük potensial mövcuddur
Fəqət Şadlinskaya
YAP Bərdə rayon təşkilatının sədri
Strateji tərəfdaşlıq mərhələsinə daxil olan Azərbaycan-ABŞ münasibətlərinin bütün istiqamətlərdə uğurlu inkişafı üçün böyük imkanlar mövcuddur. Bunu bu günlərdə ölkəmizdə rəsmi səfərdə olan ABŞ-ın Vitse-prezidenti Cey. Di. Vensin keçirdiyi görüşlərdə səsləndirilən fikirlər, imzalanan Strateji Tərəfdaşlıq haqqında Xartiya da təsdiqləyir. Bu sənəddə iki ölkənin əlaqələrinin gələcək inkişafını əks etdirən məqamlar yer alıb.
Ölkələr arasında əməkdaşlıqda diqqət göstərilən sahə iqtisadiyyatdır. Strateji Tərəfdaşlıq haqqında Xartiyanın “Regional Bağlantılar, o cümlədən Enerji, Ticarət və Tranzit” bölməsində qeyd edilir ki, Azərbaycan və Amerika Birləşmiş Ştatları Trans-Xəzər Nəqliyyat Dəhlizini (Orta Dəhliz) əsas götürərək quru, dəniz və hava nəqliyyatı infrastrukturunun inkişafı; enerji və data bağlantısı; ticarət və tranzitin asanlaşdırılması; gömrük nəzarəti və sərhəd keçidi; beynəlxalq multimodal logistika; və digər əlaqəli sahələrdə əməkdaşlıq yolu ilə regional bağlantıları təşviq etmək üçün birgə işləmək niyyətindədirlər. Onlar 8 avqust 2025-ci il tarixli Vaşinqton Sülh Zirvə Görüşünün Bəyannaməsinə uyğun olaraq iştirakçı ölkələrə beynəlxalq və ölkədaxili bağlantı üçün qarşılıqlı faydaları təmin etməklə, Azərbaycanın əsas hissəsi və onun Naxçıvan Muxtar Respublikası arasında maneəsiz bağlantını təmin edəcək və regionun beynəlxalq ticarət, tranzit potensialını reallaşdıracaq multimodal bağlantı layihəsi kimi Beynəlxalq Sülh və Rifah naminə Tramp Marşrutunun (TRIPP) əhəmiyyətini qəbul edirlər. Hər iki ölkə “Əsrin müqaviləsi”, Cənub Qaz Dəhlizi kimi layihələrin həyata keçirilməsi ilə nəticələnmiş və sıx əməkdaşlıq sayəsində hər iki tərəfə və daha geniş regiona fayda vermiş Azərbaycan-ABŞ münasibətlərinin məhsuldar tarixinə əsaslanaraq, ikitərəfli iqtisadi əlaqələri təşviq etmək məqsədilə biznes mühitinin, ticarət və sərmayə axınlarının inkişaf etdirilməsi istiqamətində çalışmaq niyyətindədirlər.
Dövlət başçısı İlham Əliyev ABŞ-ın Vitse-prezidentinin ölkəmizə səfəri ərəfəsində ABŞ Ticarət Palatasının beynəlxalq üzvlərlə əlaqələr, Yaxın Şərq və Türkiyə üzrə baş vitse-prezidenti Kuş Çoksinin başçılıq etdiyi nümayəndə heyətini qəbul etdi. Ölkəmizə səfər etməkdən məmnunluqlarını ifadə edən bir çox nüfuzlu şirkətin təmsilçiləri Azərbaycanla əməkdaşlığı genişləndirmək niyyətində olduqlarını dedilər. Onlar təmsil etdikləri şirkətlərin fəaliyyəti, həmçinin ölkəmizlə həyata keçirdikləri əməkdaşlıq barədə məlumat verdilər.
Cənab İlham Əliyev həmin görüşdə bir daha Azərbaycanın malik olduğu iqtisadi imkanlardan, ölkəmizin investisiya cəlbediciliyindən, neft siyasətinin məntiqi davamı olan qeyri-neft sektorunun inkişafından, ənənəvi əməkdaşlıq sahələri ilə yanaşı, rəqəmsal transformasiya, süni intellect kimi çox vacib sahələrdən bəhs etdi. Bu əminliyi ifadə etdi ki, Amerika şirkətləri bizim əsas tərəfdaşlarımız olacaq.
Strateji Tərəfdaşlıq haqqında Xartiyada bütün bu hədəflər öz əksini tapıb. Dövlətimizin başçısı İlham Əliyevin qeyd etdiyi kimi, Strateji Tərəfdaşlıq haqqında Xartiyanın bu gün imzalanması mərasimi heyətlərimizin altı ay ərzində gördüyü çox gərgin işin təzahürüdür. Altı ay əvvəl Prezident Trampla Vaşinqtonda tarixi görüş və Strateji Tərəfdaşlıq haqqında Xartiyanın tərtib edilməsi üçün işçi qrupunun yaradılması haqqında sənədin imzalanması ikitərəfli əməkdaşlıq üçün yeni imkanlar yaratdı.
Ölkələrimiz arasında dostluq əlaqələri möhkəmlənir, tərəfdaşlıq keyfiyyətcə yeni səviyyəyə yüksəlir. İqtisadi-ticari, energetika, nəqliyyat, sənaye, aviasiya, yüksək texnologiyalar, sərmayə qoyuluşu və digər mühüm sahələrdə qarşılıqlı faydalı əməkdaşlığımızın inkişafı üçün böyük potensial mövcuddur.
