Şəhidlər unudulmur, çünki onlar Vətən kimidir FOTO
Vətən müharibəsində döyüş meydanında düşmənə qan qusdurub torpaq naminə şəhidlik zirvəsinə ucalan Mirməhəmmədəli Tərlan oğlu Rzazadə Lənkəran rayonu, Şilavar kəndindəndir. İndi Lənkəranda böyük də, kiçik də öz qəhrəman oğlu ilə qürur duyur, adını uca tuturlar. Müharibədə göstərdiyi şücaəti ölümündən sonra “Vətən uğrunda”, “Cəbrayılın azad olunmasına görə” medalları ilə təltif olunub. Qəhrəman Vətən oğlu öz doğma kəndində uyuyur. Onun məzarı bütün kənd camaatının and yeridir.
Şəhidin ad günündə Lənkəran Regional Mədəniyyət İdarəsinin rəisi Şahin Şahbazov, Lənkəran şəhər Heydər Əliyev Mərkəzinin direktoru Reyhanə Sadıxova və digər əməkdaşları, eləcə də Gənclər İnkişaf və Karyera Mərkəzinin Lənkəran nümayəndəliyinin rəhbəri Famil Məmmədov onun ailə üzvlərinin yanında olublar . Ailənin qayğıları ilə tanış olduqdan sonra şəhidin şərəfli döyüş yolundan, Vətənə, torpağa sevgisindən bəhs edib, xatirə kitabına ürək sözlərini yazıblar.
Daha sonra Şəhidlər Xiyabanını ziyarət edən qonaqlar Azərbaycanın qəhrəman oğullarının xatirəsini anaraq məzarları üzərinə gül-çiçək dəstələri düzüblər.
Zəfər Orucoğlu
Azərbaycan Jurnalistlər Birliyinin üzvü
