Milli Qurtuluş Günü Azərbaycan tarixinin şanlı qürur səhifəsinə çevrildi
Fəqət Şadlinskaya
YAP Bərdə rayon təşkilatının sədri
Müasir müstəqil Azərbaycan dövlətinin qurucusu, Ulu Öndər Heydər Əliyevin “Azərbaycan böyük təhlükə qarşısında idi. Çünki Azərbaycanın müstəqil yaşamasının əleyhinə olan həm daxildəki qüvvələr güclü idi, həm də Azərbaycan kimi böyük coğrafi-strateji əhəmiyyətə, zəngin təbii sərvətlərə malik olan ölkənin tam müstəqil olması başqa ölkələrdə bəzi dairələri qane etmirdi. Ermənistanın Azərbaycana etdiyi təcavüz və bunun nəticəsində Azərbaycanın zəifləməsi, məğlubiyyətə uğraması, ikinci tərəfdən də daxildə hakimiyyət çəkişməsi 1992-ci ilin iyun ayında hakimiyyətə gəlmiş qüvvələri bir ildən sonra hakimiyyətdən saldı, xalq özü saldı” fikirləri müstəqilliyimizin bərpasının ilk illərində Azərbaycanın yaşadığı durumun ümumiləşdirilmiş ifadəsidir. Reallıq budur ki, müstəqilliyimizin bərpasının ilk illərində ölkəyə səriştəsiz, idarəçilik təcrübəsi olmayan ünsürlərin rəhbərlik etməsi böyük faciələrə yol açdı. Ölkədə hakimiyyət böhranı 1993-cü ilin iyununda kulminasiya həddinə çatdı, xaos və anarxiya respublikanı bürüdü. Vətəndaş müharibəsi həddinə çatmış qarşıdurma nəinki dövlət müstəqilliyimizi, hətta milli varlığımızı belə birbaşa hədəfə aldı. Beləliklə, 1991-ci ildən 1993-cü ilin iyununun birinci öngünlüyünə qədərki dövr ölkəmizin müasir tarixində hərc-mərclik, özbaşınalıq illəri kimi xatırlanır. Bütün bunlar isə həmin dövrdə yeni yaradılmış müstəqil dövlətə liderlik xüsusiyyətlərinə malik olmayan, siyasi hadisələrə qiymət vermək, gələcəyi görmək imkanlarından məhrum olan, adi vəziyyətdən belə çıxış yolu tapmağa qadir olmayan şəxslərin rəhbərlik etməsinə görə baş verirdi. Hadisələri düzgün qiymətləndirə bilməyən ovaxtkı iqtidar əhali arasında gündən-günə nüfuzunu itirir, baş vermiş proseslərdən düzgün nəticə çıxara bilmirdi. Torpaqlarımızın Ermənistan silahlı qüvvələri tərəfindən davamlı işğalı, getdikcə gərginləşən siyasi vəziyyət, əhalinin gündən-günə ağırlaşan sosial durumu ölkəni bu bəlalardan xilas edə biləcək, xalqı öz arxasınca aparmağa qadir Liderə ehtiyac olduğunu şərtləndirdi. Ümummilli Lider Heydər Əliyevin hakimiyyətə qayıdışı çağırışı bütün xalqın istəyi idi. Xalqımız Ümummilli Lider Heydər Əliyevin ətrafında sıx birləşməklə öz gələcək taleyini özü həll etmək niyyətində idi. Beləliklə, 1993-cü il iyunun 9-da Ulu Öndər Heydər Əliyev xalqın çağırışına səs verərək Bakıya qayıtdı və zəngin idarəçilik təcrübəsi sayəsində ölkəmizi bəlalardan xilas etdi. Həmin gündən böyük qurtuluşa doğru mühüm addımlar atıldı. Xalqımızı nicata aparan yol bilavasitə həmin gündən başlandı. Ümummilli Lider Heydər Əliyevin adı ilə bağlı olan Milli Qurtuluş Günü Azərbaycan tarixinin şanlı qürur səhifəsinə çevrildi. 1993-cü il iyunun 15-də Ulu Öndər Heydər Əliyevin hakimiyyətə qayıdışı ilə Azərbaycan dərin ictimai-siyasi və iqtisadi böhrandan xilas oldu, inkişafın sarsılmaz təməlləri qoyuldu. Həmin tarixdə Ümummilli Lider Azərbaycan Respublikası Ali Sovetinin sədri seçildi. 1993-cü il iyunun 24-də Milli Şuranın qərarı ilə Azərbaycan Respublikası Prezidentinin səlahiyyətləri Ali Sovetin sədri Ulu Öndər Heydər Əliyevə verildi. 1997-ci ilin iyun ayında isə Milli Məclis 15 İyun gününü bayram elan etdi.
15 İyun tarixindən başlanan inkişaf, tərəqqi yolu Azərbaycanı qalibiyyətə qovuşdurdu. 44 günlük İkinci Qarabağ müharibəsində qazanılan möhtəşəm Zəfər Ulu Öndər Heydər Əliyevin siyasi kursunun uğurlu davamının məntiqi nəticəsidir. Ümummilli Liderin ən böyük arzusu Şuşanı, Qarabağı və Zəngəzuru azad görmək idi. Prezident İlham Əliyev böyük qürur hissi ilə bildirir: “Mən xoşbəxt insanam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Bu gün şəhidlərimizin, Ulu Öndərin ruhu şaddır! Gözün aydın olsun, Azərbaycan!”
Qurtuluşun Azərbaycana qazandırdığı uğurlar sırasında hazırda cənnət məkana çevrilən Qarabağımızın və Şərqi Zəngəzurumuzun mərhələ-mərhələ sakinlərinə qovuşmasını qeyd edirik. Müzəffər Ali Baş Komandan İlham Əliyev mütəmadi olaraq azad edilmiş torpaqlara səfərlər edir, bayramlarımız, tarixi günlərimiz bu məkanlarda qeyd edilir, dövlətimizin başçısı dünyaya mesajlarını çatdırır. Ərazi bütövlüyümüzün və suverenlyimizin tam bərpa edilməsi hər birimizi qürurlandırır. Xalqımız əmindir ki, müasi müstəqil, qalib Azərbaycanımız bundan sonra da Prezident İlham Əliyevin rəhbərliyi ilə daha uca zirvələr fəth edəcək, düşmənin yerlə-yeksan etdiyi Qarabağ və Şərqi Zəngəzur dünyanın ən gözəl guşələrindən birinə çevriləcək.
Azərbaycan-Türkiyə birliyi bütün istiqamətlərdə nümunədir
Bu gün 15 İyun Milli Qurtuluş Günündən bəhs edərkən bu tarixdə imzalanan Şuşa Bəyannaməsi də xüsusi vurğulanır. Üç il bundan öncə Qarabağın tacı Şuşa Azərbaycan və Türkiyənin müttəfiqliyinin rəsmiləşdirilməsinə şahidlik etdi. Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın imzaladığı Müttəfiqlik Bəyannaməsi iki qardaş ölkə arasında tarixi münasibətlərin yeni mərhələsinin əsasını qoydu. Ölkələrimiz arasındakı müttəfiqlik əlaqələri siyasət, beynəlxalq müstəvidə birgə əməkdaşlıq, iqtisadiyyat, enerji təhlükəsizliyi, nəqliyyat, mədəniyyət, təhsil, ordu quruculuğu və digər strateji sahələri əhatə edir. Bu sənəd əhatəli sülhə və inteqrasiyaya yol açır, bölgədə inteqrasiya proseslərini stimullaşdırır. Azərbaycan-Türkiyə birliyini daimi edən, günbəgün möhkəmlənməsini şərtləndirən amillər tarix, mədəniyyət, ortaq etnik köklər, dilimiz, dinimiz, milli dəyərlərimiz, milli maraqlarımız, xalqlarımızın qardaşlığıdır. Böyük fəxr hissi ilə qeyd edirik ki, bu gün Türkiyə və Azərbaycan dünya miqyasında nadir əməkdaşlıq, iş birliyi, müttəfiqlik nümunəsi göstərir. Şuşa tarixi gün yaşamaqla yanaşı, yazdığı tarixlə mesajlarını ünvanladı. Hər bir addım özündə iki dost ölkənin birliyini ifadə edir və dünyaya bu mesajı çatdırır ki, bu birlik bütün istiqamətlərdə nümunədir.
44 günlük İkinci Qaranağ müharibəsində olduğu kimi, postmünaqişə dövrünün reallıqları fonunda işğaldan azad olunmuş ərazilərin yenidən qurulması prosesində də Azərbaycan ilə Türkiyə arasında sıx əməkdaşlıq mövcuddur. Onu da qeyd edək ki, Zəngəzur dəhlizinin həyata keçirilməsi ilə Şərqdən Qərbə hər kəsin istifadə edə biləcəyi yeni bir ortaq iqtisadi dəhliz açılacaq. Türkiyə ilə Azərbaycanı dəmiryolu və avtomobil yolu ilə birləşdirəcək Zəngəzur dəhlizi reallığa çevrilir. Zəngəzur geosiyasi əhəmiyyətə malik olan nəqliyyat layihəsidir.
“Ümumilikdə türk dünyasının birliyi Azərbaycanın xarici siyasətində prioritet məsələlərdəndir. Ölkəmiz Türk Dövlətləri Təşkilatının beynəlxalq nüfuzunun artması istiqamətində mühüm addımlar atır.” Cənab İlham Əliyev iyunun 6-da TÜRKPA-nın növbəti plenar iclasının iştirakçılarını qəbul edərkən onu da qeyd etdi ki, biz indi yeni addımlar atmağa başlamışıq. Ancaq bəlkə də tarixdə bu qədər sürətlə inkişaf edən ikinci bir təşkilat olmayıb. Ona görə bu gün birinci mərhələdəyik. Bütün səylərimiz cəmiyyətlərə ciddi bir mesaj olacaq: “Bax, bizim yolumuz budur və müstəqil ölkələr kimi rahat yaşamaq üçün birlik daha güclü olmalıdır.”
