Bayağı ifaçıları “boykot” çağırışı – Nəticə olacaqmı
Aparıcı Elgiz Əkbər öz verilişində çağırış edib ki, bayağı, şit, səsi olmayan, amma ulduz kimi təqdim olunan ifaçılar boykot olunsun. Onun fikrincə, televiziya və radionun missiyası insanları maarifləndirmək, gündəmdəki məsələləri işıqlandırıb müzakirə etmək, insanların gündəlik qarşılaşdığı problemləri gündəmə gətirmək, dünyada baş verən hadisələri operativ şəkildə çatdırmaq, düşündürmək, əyləndirməkdir.
“O missiyalardan biri də insanların musiqi zövqünü formalaşdırmaqdır. Efir vasitəsilə həmkarlarıma səslənirəm, təklif edirəm ki, bayağı, şit, səsi olmayan, amma ulduz kimi təqdim olunan ifaçıları boykot edək. Hamımız söz verək onları efirə dəvət etməyək. Bu siyahıda mən birinciyəm. Qoşulursunuzsa, bunu edək, amma əgər bu tərəfdən qoşulub, digər tərəfdən efirinizə həmin ifaçıları çağıracaqsınızsa, o zaman sözüm yoxdur”, – aparıcı əlavə edib.
Bu çağırışa mütəxəssislərin münasibəti necədir? Hansı müğənnilərdən söhbət gedir və onları necə təsnifatlaşdırmaq olar?
Əlbəttə ki, televiziya və radio yalnız əyləncə vasitəsi deyil, eyni zamanda maarifləndirici və tərbiyəvi funksiyaya malik platformalardır. Bu baxımdan, efirdə təqdim olunan sənətçilərin kimliyi, səviyyəsi və təqdim etdiyi kontentin keyfiyyəti birbaşa ictimai zövqə təsir edir. Tele-tənqidçilər də qeyd edir ki, son dövrlər efirdə ard-arda təqdim olunan bayağı musiqilər, səviyyəsiz kliplər və özünü “ulduz” kimi təqdim edən, amma nə səsi, nə də sənət düşüncəsi olmayan şəxslər cəmiyyətin musiqi zövqünü korlayır. Bu cür müğənnilər adətən qalmaqallı şəxsi həyatları, sosial şəbəkələrdəki reallıqdan uzaq görüntüləri, şişirdilmiş reklam kampaniyaları və ya müəyyən dairələrin dəstəyi ilə gündəmdə saxlanılır. Onlar tədricən əsl sənətçiləri kölgədə qoyur, gənc nəslin musiqiyə və sənətə olan baxışını zəhərləyirlər.
Tele-tənqidçilər həmçinin qeyd edir ki, bu cür müğənniləri boykot yoluyla efirlərdən uzaqlaşdırmaq mümkün deyil, amma efirdə yer verilməməsi onların təsir gücünü zəiflədə bilər. Əsas məsələ isə tamaşaçının və dinləyicinin də seçiciliyini artırmaq, musiqini əyləncədən çox sənət kimi qəbul etdirməkdir.
Qulu Məhərrəmli
Əməkdar jurnalist, tele-tənqidçi Qulu Məhərrəmli mövzu ilə bağlı “Yeni Müsavat”a danışıb:
“Əslində, aparıcı Elgiz Əkbərin müraciəti normal və yerində bir müraciətdir. Televiziyada uzun müddət aparıcılıq edən, müəyyən zövqə və aparıcılıq qabiliyyətinə malik bir adamın çağırışıdır. İndi təsəvvür edin, televiziya kanallarında vəziyyət hansı həddə çatıb ki, əsasən əyləncə yönümlü verilişin aparıcısı belə bu duruma etiraz edir.
Söhbət, əlbəttə, elə müğənnilərdən gedir ki, onlar sözün əsl mənasında ciddi istedad sahibi deyillər, lakin bu telekanaldan çıxıb digərinə keçir, verilişlərdə tez-tez qonaq olurlar. Təbii ki, onların məqsədi sənəti inkişaf etdirmək və ya yüksək zövq formalaşdırmaq deyil. Bu cür istedadsız müğənnilərin əksəriyyətinin efirə çıxmasının əsas səbəbi toylara yol açmaq, dəvət almaqdır. Yəni televiziyadan bir vasitə kimi istifadə edirlər. Diqqət yetirirəm ki, artıq “YouTube” kanallarında da bu cür müğənnilər üstünlük təşkil etməyə başlayıb.
Əslində, elə bir vəziyyət olmalı idi ki, televiziya bu hala düşməyəydi, istedadsız müğənnilər efiri işğal etməyəydi və belə çağırışlara ehtiyac qalmayaydı. Lakin vəziyyət artıq bu həddə çatıb. Özəl televiziya kanallarında bu, ciddi problemdir. Müğənni gəlib efirə çıxmaq üçün pul ödəyir və bəzən buna haqq da qazandırılır, guya həmin müğənni televiziya kanalına və ya kiməsə maddi dəstək verir.
Ona görə də ölçülər müəyyən olunmalıdır. İstedadın göstəricisi hər halda efirə çıxmaq bacarığı deyil, bu, sənət duyğusu olan hər kəsə bəllidir. Əgər bu təşəbbüs mahiyyətcə davamlı olacaqsa, prosesin nəticəsi də olacaq. Təəssüf ki, çox şey aparıcıdan asılı olmur. Aparıcılara göstəriş verilir ki, filan müğənnini dəvət etsinlər. O da ya verilişdən imtina etməli, ya da məcbur olub həmin müğənnini efirə çağırmalıdır. Bu, bir qədər mürəkkəb məsələdir və ümid edək ki, hər halda bu çağırış müəyyən effekt verəcək”.
