Azərbaycan, Türkmənistan və Özbəkistan münasibətlərində yeni mərhələ
2025-ci il 22 avqust tarixində Türkmənistanın Avaza şəhərində Azərbaycan, Türkmənistan və Özbəkistan liderlərinin iştirakı ilə keçirilən yüksək səviyyəli görüş tarixi hadisə kimi yadda qaldı. Görüşün nəticələri və qəbul edilən bəyanat qardaş ölkələr arasında münasibətlərin daha da möhkəmlənməsinə, çoxtərəfli əməkdaşlıq formatının yaradılmasına və regionda sabitliyin təmin edilməsinə mühüm töhfə verdi.
Azərbaycan Respublikasının Prezidenti cənab İlham Əliyevin bəyanatında diqqətə çatdırdığı əsas məqamlardan biri Türkmənistanın etibarlı əllərdə olması və ölkədə aparılan inkişaf siyasətinin uğurları ilə bağlıdır. Qurbanqulu Məlikquliyeviçin müdrik rəhbərliyi nəticəsində Türkmənistanın sürətli inkişaf yolu keçdiyi, şəhər və kəndlərin abadlaşdığı xüsusi qeyd olundu. Bu yanaşma Azərbaycan–Türkmənistan münasibətlərinin qarşılıqlı hörmət və etimad prinsiplərinə əsaslandığını nümayiş etdirir.
Görüş çərçivəsində imzalanmış sənədlər arasında Füzuli şəhəri ilə Arxadağ şəhərinin qardaşlaşması barədə sənədin xüsusi əhəmiyyəti vardır. Bu addım xalqlarımız arasında əsrlərdən bəri mövcud olan dostluq və qardaşlıq münasibətlərinin rəmzi hesab olunur. Eyni zamanda, Türkmənistanın Füzuli şəhərində məscid inşa edilməsi təşəbbüsü də qardaşlıq bağlarının daha da möhkəmləndirilməsinə xidmət edir. Prezident İlham Əliyevin də qeyd etdiyi kimi, bu layihə türkmən xalqının Azərbaycan xalqına hörmət və dəstəyinin bariz nümunəsidir.
Qardaşlıq münasibətlərinin digər parlaq nümunəsi isə Özbəkistanın təşəbbüsləridir. Xankəndi şəhərində fəaliyyət göstərən böyük tikiş fabriki və Füzulidə istifadəyə verilmiş Mirzə Uluqbəy adına 960 şagird yerlik orta məktəb Qarabağın sosial-iqtisadi inkişafına mühüm töhfə verir. Bu layihələr həm də Azərbaycan və Özbəkistan xalqları arasında qarşılıqlı dəstəyin və birliyin əyani təzahürüdür.
Azərbaycan Prezidenti öz çıxışında vurğuladı ki, Azərbaycan və qardaş ölkələr arasında münasibətlər yalnız ikitərəfli deyil, həm də çoxtərəfli müstəvidə genişlənəcəkdir. Bu məqsədlə müvafiq dövlət qurumlarına üçtərəfli əməkdaşlıq formatının yaradılması və konkret istiqamətlər üzrə təkliflərin hazırlanması tapşırılmışdır. Nəqliyyat, tranzit, logistika, enerji, neft-qaz sahələri və mədəniyyət istiqamətində əməkdaşlığın dərinləşdirilməsi qarşıdakı illərdə üç ölkə arasında əlaqələrin əsas prioritetləri olacaqdır.
Bəyanatda vurğulandığı kimi, Avazadakı görüş sadəcə protokol xarakterli tədbir deyil, həm də tarixi əhəmiyyət daşıyan sammitdir. Bu görüş nəticəsində regionda yeni əməkdaşlıq platforması formalaşır ki, bu da sülhün, sabitliyin və davamlı inkişafın təmin edilməsinə xidmət edir.
Nəticə etibarilə, 22 avqust 2025-ci il tarixində imzalanmış bəyanat və əldə edilmiş razılaşmalar Azərbaycan, Türkmənistan və Özbəkistan arasında münasibətlərin strateji tərəfdaşlıq səviyyəsinə yüksəldiyini göstərir. Bu münasibətlər xalqlarımızın tarixi qardaşlıq bağlarına söykənərək, gələcəkdə daha geniş miqyasda siyasi, iqtisadi və mədəni əməkdaşlığa yol açacaqdır.
Türkan Şadlinskaya – Bərdə rayon Heydər Əliyev Mərkəzinin elmi işçisi
