Xarici tələbələr niyə təhsil üçün Azərbaycanı seçmirlər?
Son illər Azərbaycan ali təhsil müəssisələrinə qəbul olan xarici tələbələrin sayı artsa da, bu göstərici region ölkələri ilə müqayisədə hələ də aşağıdır.
Təhsil eksperti Yusif Cəfərov BiG.AZ-a bildirib ki, ilk növbədə, Azərbaycan universitetlərinin beynəlxalq reytinqlərdə mövqeyi hələ istənilən səviyyədə deyil:
“Dünya universitetləri arasında yer tutmaq, tədris proqramlarını beynəlxalq standartlara uyğunlaşdırmaq və diplomların xaricdə tanınmasını təmin etmək vacibdir. Bu sahədə müəyyən addımlar atılsa da, hələ genişmiqyaslı nəticə əldə olunmayıb.
Bir çox ölkələr xarici tələbələr üçün xüsusi təqaüd proqramları, sosial dəstək və aktiv reklam kampaniyaları həyata keçirir.
Azərbaycanın təhsil potensialı var, lakin onun dünyaya tanıdılması istiqamətində ardıcıl strategiya yetərincə güclü deyil. Xarici gənclər daha çox Avropa, Türkiyə və ya Asiya ölkələrini seçir, çünki həmin dövlətlər təhsil turizmini ciddi şəkildə inkişaf etdiriblər.
Xarici tələbələr üçün yaşayış şəraiti, kampus infrastrukturu, ingilisdilli tədris proqramlarının azlığı da seçim prosesinə təsir edir. Tədris dili və mühit nə qədər beynəlxalq səviyyədə uyğunlaşsa, tələbələrin marağı bir o qədər artar.Azərbaycanın coğrafi mövqeyi və təhlükəsizliyi ölkəyə tələbə axını üçün üstünlük yaradır, lakin bu üstünlüyün real nəticəyə çevrilməsi üçün dövlət və universitetlərin birgə tanıtım və keyfiyyət strategiyasına ehtiyac var”.
