Bayram süfrəsi neçəyə başa gəlir? – Novruz yarmarkasından REPORTAJ
Rəngarəng bəzədilmiş səmənilər, şəkərbura və paxlava qoxusu, bayram dekorları və insanların gülümsəyən siması… Novruz bayramı yaxınlaşdıqca şəhərdə canlanma, bayram ab-havası hiss olunur. Məhz bu ərəfədə paytaxtın müxtəlif yerlərində təşkil olunan yarmarkalar şəhərə xüsusi rəng qatır. Kənd Təsərrüfatı Nazirliyinin tabeliyində fəaliyyət göstərən “Aqrar Tədarük və Təchizat” ASC tərəfindən “Gənclik” metrostansiyası yaxınlığında təşkil olunan “Kənddən Şəhərə” Novruz yarmarkası da bayramın daha xoş keçməsində xüsusi önəm daşıyır.
Qeyd edək ki, burada 25 regiondan iştirak edən 55 fermer bayram süfrəsi üçün 145 çeşiddə kənd təsərrüfatı və qida məhsullarının satışını həyata keçirir. Yarmarkanın fəaliyyəti 7-18 mart tarixlərində hər gün saat 09:00-dan 19:00-dək nəzərdə tutulub. Biz də yarmarkaya baş çəkərək satıcılarla söhbət etdik, qiymətlər və satışlarla bağlı məlumat topladıq, bir ailənin bayram süfrəsinin neçəyə başa gəldiyini müəyyənləşdirməyə çalışdıq.
Beləliklə, Publika.az “Kənddən Şəhərə” Novruz yarmarkasından hazırladığı reportajı təqdim edir:
İlk olaraq, yarmarkanın girişində təqdim olunan bal piştaxtasına yaxınlaşdıq. Arıçı fermer Qəhrəman İbrahimov bildirdi ki, hər il yarmarkada iştirak edərək, alıcılara bir neçə çeşiddə bal təqdim edir:
“Çiçək, meşə, qaratikan və cökə balı kimi çeşidlər var. Alıcıları nəzərə alaraq çalışırıq ki, məhsulları bazar qiymətlərindən nisbətən ucuz qiymətə təqdim edək. Sağlamlığını düşünənlər məhz bu ballardan ala bilərlər. Məsələn, meşə balı ürək-damar xəstəliyi, qaratikan balı qaraciyər, böyrək və öd, çökə balı isə soyuqlama və bronxlar üçün xeyirlidir. Balın qiymətini isə çeşidinə görə 20-30 manat olaraq təklif edirik”.
Ümumiyyətlə, yarmarkada bal qiymətləri 20-35 manat arasında dəyişir. Zaqataladan gələn arıçı mütəxəssis Kənan dayı deyir ki, müştərilərinə endirimlər də edir:
“6 ildir ki, bu yarmarkada iştirak edirəm. Əgər təmiz məhsul satırsansa, alıcıların da çox olur”.
Yarmarkada diqqətimizi çəkən məqamlardan biri fındıq qiymətləri oldu. Müşahidələrimizə əsasən, ötənilki qiymətlərlə hazırkı qiymətlər arasında xeyli fərq var. Əvvəlki illərdə qabıqlı fındıq 5-8, ləpə fındıq isə 13-18 manata təklif olunurdusa, bu il bu rəqəmlər 10-12 və 20-22 manat olaraq dəyişib.
Qəbələdən olan satıcı Şahmar dayının sözlərinə görə, bunun səbəbi bu il yerli fındığın az məhsul gətirməsidir:
“Qiymətlərin bahalaşması səbəbindən bu il alıcılıq qabiliyyəti də zəifdir. Bahalaşmaya da məhsulun azlığı səbəb olub”.
Digər qiymətlərə gəldikdə isə meyvələrdən armud 1,50, alma növünə görə 1-3, portağal 3, üzüm 2, qabıqlı qoz 7-10, qoz ləpəsi 12-20, şabalıd 11, badam ləpəsi 14-18 manata təklif olunur.
Quru meyvələrdən innab 8-11, xurma 5-10, ərik qurusu 10, kişmiş 8-18, iydə 12, gavalı qurusu isə 7-14 manata müştərilərə təqdim edilir.
Yarmarkada diqqətçəkən digər məqam isə ət satışının az olmasıdır. Bunun üçün yalnız bir stend ayrılıb və burada mal əti 16, qoyun əti isə 17 manata satılır.
Bayram süfrəsindəki isti təam və salatlarda istifadə olunan kartof 0,70-1,40, soğan 0,25-0,40, çuğundur 0,50-1, pomidor 4,50, xiyar 4,50, kök 1, turp isə 1 manata təklif edilir.
Yarmarkada ağartı məhsullarına ayrılan piştaxtada pendir 10-14, qatıq 1,50-4, süzmə 4, qaymaq 6, süd 1,50, ərinmiş yağ 20 manata alıcıya təqdim olunur.
Həmçinin çayın yanında tez-tez istifadə olunan mürəbbələr növünə və ölçüsünə görə 8-15 manata satılır. Alıcılara həmçinin turşular da təklif olunur ki, onların da qiyməti kilo və növünə görə 3-16 manat arasında dəyişir.
Sözsüz ki, Novruz süfrəsini səmənisiz təsəvvür etmək olmaz. Səmənilər isə dekorasiya və ölçüsünə görə 1-15 manata müştərilərə təqdim edilir.
Beləliklə, qeyd olunanların əsasında deyə bilərik ki, 4-5 nəfərlik ailənin bayram süfrəsi təxminən 200-250 manata başa gəlir.
Yarmarkada həmçinin uşaqlar üçün xüsusi guşə mövcuddur və valideynlər alış-veriş edərkən övladları orada əyləncəli zaman keçirə bilərlər.
Onu da nəzərinizə çatdıraq ki, Aqrar Tədarük və Təchizat İdarəsinin ictimaiyyətlə əlaqələr və marketinq şöbəsinin müdiri Nilüfər Qaçayeva Publika.az–a açıqlamasında “Kənddən şəhərə” yarmarkasının regionlar da daxil olmaqla ümumilikdə 11 əlavə məntəqədə təşkil olunduğunu bildirdi:
“Yarmarkalarda 25 regiondan iştirak edən 146 fermer, 145 çeşiddə kənd təsərrüfatı və qida məhsulları satışını həyata keçirir. Yarmarkaların təşkilində əsas məqsəd bayram günlərində yerli fermerlərin məhsullarının bazara çıxışını dəstəkləmək, eyni zamanda şəhər sakinlərinin təbii, yerli və sağlam kənd məhsullarına əlçatanlığını təmin etməkdir. Satışa çıxarılan məhsulların keyfiyyətinə nəzarət Azərbaycan Qida Təhlükəsizliyi Agentliyinin Səyyar Qida Laboratoriyası tərəfindən həyata keçirilir.
Yarmarkalar “Gənclik” metrostansiyası ilə yanaşı, “Əhmədli”, “Neftçilər”, “Nəriman Nərimanov”, “Azadlıq prospekti” və “Elmlər Akademiyası” metrostansiyalarının çıxış hissələrində, eyni zamanda, regionlarda- Sumqayıt şəhəri, Xankəndi şəhəri, Cəbrayıl, Zəngilan, Ağdaş şəhəri və Abşeron rayonunun Mehdiabad qəsəbəsində fəaliyyət göstərir. Yarmarkalarda fermerlər piştaxta, tərəzi və digər lazımi avadanlıqlarla ödənişsiz şəkildə təmin olunur”.
Roza Şəfiyeva
