Etimadın zirvəsində dayanan Lider – ŞƏRH

İctimai rəy Prezident İlham Əliyevin fəaliyyətinə yüksək qiymət verir. Rəqəmlər göstərir ki, dövlət başçısına olan inamın əsasını bütün sahələrdə qazanılan uğurlar və həyata keçirilən ardıcıl siyasət təşkil edir

Cəmiyyətdə formalaşan ictimai rəy dövlət idarəçiliyinin səmərəliliyinin, həyata keçirilən siyasətin və qəbul olunan qərarların vətəndaşlar tərəfindən necə qiymətləndirildiyini göstərən əsas meyarlardan biridir. Məhz bu baxımdan mütəmadi keçirilən ictimai rəy sorğuları ölkədə mövcud ictimai-siyasi ovqatı, vətəndaşların dövlət idarəçiliyinə münasibətini və müxtəlif istiqamətlər üzrə gözləntilərini müəyyənləşdirmək baxımından mühüm əhəmiyyət daşıyır. Bu məqsədlə Medianın İnkişafı Agentliyi 2026-cı ilin birinci yarısında Prezident İlham Əliyevin fəaliyyətinə ölkə vətəndaşlarının münasibətini öyrənmək, bu sahədə müşahidə olunan dinamikanı və əsas tendensiyaları təhlil etmək məqsədilə genişmiqyaslı ictimai rəy sorğusu keçirib. Sorğunun nəticələri Prezident İlham Əliyevin fəaliyyətinə ictimai münasibətin əsas istiqamətlərini, vətəndaşların dövlət başçısının həyata keçirdiyi siyasətə verdiyi qiyməti və ölkənin inkişaf kursuna baxışını əks etdirməsi baxımından diqqət çəkir.

Rəyi soruşulanların 87,7 faizinin dövlət başçısına etimad göstərməsi, 93,6 faizinin onun fəaliyyətini müsbət qiymətləndirməsi, 81,9 faizinin isə Prezident İlham Əliyevi alternativsiz siyasi lider hesab etməsi cəmiyyətdə formalaşmış siyasi etimad mühitini əks etdirən göstəricilər kimi təqdim olunur.

Bu yüksək etimadın əsas səbəblərindən biri Prezident İlham Əliyevin uzunmüddətli strateji hədəflərə əsaslanan, ardıcıl və praqmatik siyasət yürütməsi ilə əlaqələndirilir. Dövlət başçısının qəbul etdiyi qərarlarda milli maraqların ön planda saxlanılması, Azərbaycanın dövlət müstəqilliyinin möhkəmləndirilməsi, ölkənin təhlükəsizliyinin və suverenliyinin qorunmasının əsas prioritetlər kimi müəyyənləşdirilməsi cəmiyyətdə onun siyasi kursuna dəstəyin formalaşmasına təsir göstərən amillər sırasında qeyd olunur. Xarici siyasətdə milli maraqların qətiyyətlə müdafiə edilməsi, beynəlxalq münasibətlər sistemində Azərbaycanın mövqeyinin prinsipial şəkildə ifadə olunması da bu etimadı gücləndirən məqamlardan hesab edilir.

Xalqın dəstəyi ilə formalaşan güclü dövlət modeli

İctimai rəydə mühüm yer tutan digər amil Prezident İlham Əliyevin xalqla münasibətlərində qarşılıqlı etimada əsaslanan idarəçilik modelidir. Dövlət başçısı müxtəlif çıxışlarında siyasi fəaliyyətinin əsas dayağının Azərbaycan xalqı olduğunu vurğulayır, qəbul olunan qərarların və həyata keçirilən islahatların insanların rifahının yüksəldilməsinə xidmət etdiyini bildirir. Cəmiyyət tərəfindən də bu yanaşma dövlətlə vətəndaş arasında etibarlı münasibətlərin formalaşmasının əsas şərtlərindən biri kimi qiymətləndirilir. Məhz xalqın dəstəyi və dövlət başçısının bu dəstəyə arxalanaraq həyata keçirdiyi siyasət ölkədə sabit siyasi mühitin qorunmasına töhfə verən əsas amillərdən biri hesab olunur.

Prezident İlham Əliyevin liderlik keyfiyyətləri də ictimai etimadı şərtləndirən vacib məqamlardan biri kimi göstərilir. Böhranlı situasiyalarda operativ qərarlar qəbul etməsi, strateji baxış nümayiş etdirməsi, qarşıya qoyulan məqsədlərə ardıcıl şəkildə nail olması onun həm ölkə daxilində, həm də beynəlxalq müstəvidə nüfuzunu artıran amillər kimi dəyərləndirilir. Son illərdə Azərbaycanın ev sahibliyi etdiyi nüfuzlu beynəlxalq tədbirlər, ölkənin regional və qlobal təşəbbüslərdə fəal iştirakı Prezident İlham Əliyevin beynəlxalq səviyyədə tanınan siyasi lider kimi qəbul olunmasına təsir göstərən mühüm faktorlar sırasında qeyd edilir.

Hər uğurun arxasında strateji baxış dayanır

İctimai etimadın formalaşmasında Azərbaycanın son illərdə əldə etdiyi sosial-iqtisadi nailiyyətlər də xüsusi rol oynayır. Ölkədə həyata keçirilən genişmiqyaslı infrastruktur layihələri, qeyri-neft sektorunun inkişafı, iqtisadiyyatın şaxələndirilməsi istiqamətində atılan addımlar, enerji və nəqliyyat sahəsində reallaşdırılan strateji layihələr Azərbaycanın iqtisadi potensialını əhəmiyyətli dərəcədə gücləndirib. Bununla yanaşı, müasir silahlı qüvvələrin formalaşdırılması, müdafiə qabiliyyətinin artırılması və milli təhlükəsizlik sisteminin möhkəmləndirilməsi ölkənin dayanıqlı inkişaf modelinin mühüm tərkib hissəsi kimi qiymətləndirilir.

Azərbaycanın regional və beynəlxalq mövqeyinin güclənməsi də ictimai rəydə müsbət qiymətləndirilən istiqamətlərdən biridir. Son illərdə Azərbaycan Cənubi Qafqazda mühüm siyasi və iqtisadi aktora çevrilib, enerji təhlükəsizliyi, beynəlxalq nəqliyyat marşrutları və regional əməkdaşlıq sahəsində irəli sürdüyü təşəbbüslərlə qlobal gündəmdə fəal iştirak edir. Balanslaşdırılmış və müstəqil xarici siyasət kursu Azərbaycanın müxtəlif dövlətlərlə qarşılıqlı faydalı əməkdaşlıq münasibətlərini inkişaf etdirməsinə, milli maraqlarını beynəlxalq platformalarda ardıcıl şəkildə qorumasına imkan yaradıb.

Qələbə ilə başlayan yeni inkişaf mərhələsi

Şübhəsiz ki, Prezident İlham Əliyevə yüksək ictimai etimadın əsas səbəblərindən biri Azərbaycanın 44 günlük Vətən müharibəsində əldə etdiyi tarixi qələbə ilə bağlıdır. Bu qələbə nəticəsində uzun illər işğal altında qalan torpaqlar azad edildi, daha sonra həyata keçirilən tədbirlər nəticəsində ölkənin ərazi bütövlüyü və tam dövlət suverenliyi bərpa olundu. Bu hadisələr müasir Azərbaycan tarixinin ən mühüm mərhələlərindən biri kimi qiymətləndirilir və dövlət başçısının siyasi iradəsi, qətiyyətli rəhbərliyi ilə əlaqələndirilir.

Müharibədən sonrakı dövrdə azad olunmuş ərazilərdə aparılan genişmiqyaslı bərpa və yenidənqurma işləri, müasir şəhər və kənd konsepsiyalarının həyata keçirilməsi, nəqliyyat, enerji və sosial infrastrukturun yenidən qurulması da dövlət siyasətinin mühüm istiqamətlərindən biri kimi diqqət çəkir. Bu proseslər ölkənin uzunmüddətli inkişaf strategiyasının tərkib hissəsi olmaqla yanaşı, gələcək iqtisadi və sosial inkişaf üçün yeni imkanlar yaradır.

Sabitlik və inkişaf eyni siyasətin iki nəticəsidir

Müasir beynəlxalq münasibətlər sistemində münaqişələrin və geosiyasi gərginliyin artdığı bir dövrdə Azərbaycanda daxili sabitliyin, ictimai təhlükəsizliyin və dövlət idarəçiliyinin davamlılığının təmin olunması da ictimai etimadı şərtləndirən mühüm amillərdən hesab edilir. Sabit siyasi mühit iqtisadi inkişafın davam etdirilməsi, xarici investisiyaların cəlb olunması və sosial proqramların həyata keçirilməsi üçün əlverişli şərait yaradır. Bu baxımdan cəmiyyətdə təhlükəsizlik və sabitliyin qorunması dövlət siyasətinin mühüm nəticələrindən biri kimi qiymətləndirilir.

Beləliklə, sorğularda əks olunan yüksək etimad göstəriciləri təkcə siyasi rəqəmlər deyil, eyni zamanda, son illərdə Azərbaycanın inkişafı, beynəlxalq mövqeyinin möhkəmlənməsi, dövlət təhlükəsizliyinin təmin olunması, iqtisadi potensialının güclənməsi və tarixi nailiyyətləri fonunda formalaşmış ictimai münasibətin ifadəsi kimi təqdim edilir.

Nigar Orucova, “İki sahil”