Yollar görkəmini dəyişir
Astara rayonunda dövlət səviyyəsində, müasir tələblərə cavab verən yolların çəkilişi davam edir. Elə bunun səbəbidir ki, indi rayonun ən ucqar dağ kəndinə rahat gedib-gəlmək çox asandır. Hazırda 20 mindən çox əhalisi olan Ərçivan-Artupa- Səncərədi-Alaşa- Züngüləş kəndlərini birləşdirən avtomobil yolunda texnikanın səsi bir an belə kəsilmir. İnşaatçılar 11,6 kilometr uzunluğa malik olan bu yolu IV texniki dərəcədə yüksək keyfiyyətlə yenidən qururlar.
Artıq burada xeyli iş görülüb. Layihəyə uyğun olaraq 12 metr enində yeni yol yatağı inşa edilib. Suvarma məqsədilə çəkilmiş metal borular yararsız hala düşdüyünə görə çox yerlərdə diametri 300 və 500 millimetr olan yeni borularla əvəzlənib. İndinin özündə 130 min kvadratmetr sahədə yol əsasının alt, üst layının inşası aparılır, səth sularının kənarlaşması üçün dəmir-beton küvetlər düzəldilir və yolun keçdiyi ərazilərdə təbi sürüşmə yerlərinin qarşısında istinad divarları hörülür. Yol ustaları görülən bütün işlərə ciddi yanaşır, layihədə nəzərə tutulan şərtləri düzgün yerinə yetirirlər. Bu işlər tam şəkildə başa çatdıqdan sonra yola iri və xırda dənəli asfalt-beton örtüyü döşənəcək. Həmçinin hərəkətin düzgün təşkilindən ötrü yol nişanları, siqnal dirəkləri qoyulacaq, eləcə də yolgöstərici xəritələr çəkiləcək. Lazımi yerlərdə avtobus dayanacaqlarının quraşdırılması da nəzərdə tutulub.
Yol sırf sosial xarakter daşıyır, insanların vaxtında, rahat mənzil başına çatdırmaq üçündür. Odur ki, dövlətin bu əvəzsiz diqqət və qayğısından kənd sakinləri hədsiz sevinir, ölkə başçısına ürəkdən minnətdarlıqlarını bildirirlər.
Zəfər Orucoğlu, Azərbaycan Jurnalistlər Birliyinin üzvü
