Prezident: İtaliya doğrudan da Azərbaycanın əsl dostudur
Ölkəmizdə səfərdə olan italiyalı deputatlar Ermənistanın Gəncədə, Ağdamda törətdikləri vəhşilikləri hərbi cinayət adlandırdılar
Avropanın inkişaf etmiş ölkələrindən olan İtaliya ilə Azərbaycanın son illərdə daha da möhkəmlənən münasibətləri hər iki dövlətin iqtisadi inkişafı, siyasi münasibətlərin möhkəmlənməsi üçün etibarlı zəmin yaradır. Ölkəmizin əsas ticarət tərəfdaşlarından olan İtaliya ilə Azərbaycan arasında sürətlə davam edən mədəni, humanitar əlaqələr bu gün ən yüksək səviyyədədir.
İki il bundan əvvəl İtaliyanın Prezidenti cənab Mattarellanın Azərbaycana səfəri zamanı ikitərəfli əlaqələrin daha da möhkəmlənməsinə yönələn mühüm sənədlərin imzalanması ilə əməkdaşlığın yeni perspektivləri, real istiqamətlər müəyyənləşdirildi. Cari ilin əvvəlində Prezident İlham Əliyevin və Birinci vitse-prezident Mehriban xanım Əliyevanın İtaliyaya səfərləri zamanı keçirilən önəmli görüşlər, çoxölçülü Strateji Tərəfdaşlıq haqqında sənədin imzalanması qarşılıqlı etimadın nəticəsidir.
Bu günlərdə İtaliyanın ən nüfuzlu altı partiyasını təmsil edən nümayəndə heyətinin ölkəmizə səfəri Azərbaycana göstərilən etimaddır. Müxtəlif mövqeyə malik siyasilərin təmsil olunduğu heyətin İkinci Qarabağ müharibəsi ilə bağlı məlumatları öyrənməsi, fikirlərinin üst-üstə düşməsi erməni faşizminə nifrətin ifadəsidir.
Deputatlar Palatasının sədr müavini Ettore Rosatonun başçılıq etdiyi nümayəndə heyətini qəbul edən, iki dövlət arasındakı əməkdaşlığı genişləndirən məqamlara «Bu gün İtaliya-Azərbaycan əlaqələri həm siyasi, həm iqtisadi, həm bütün başqa sahələrdə uğurla inkişaf edir» sözləri ilə aydınlıq gətirən Prezident İlham Əliyev perspektivlərdən də söz açaraq bildirmişdir ki, qarşıdakı illərdə qeyri-neft sektoru əlaqələrin möhkəmlənməsində iştirak edəcək.
Görüşün hər iki dövlət üçün böyük əhəmiyyət daşıdığını bildirən dövlət başçımız İlham Əliyev razılığa əsasən Bakıda İtaliya-Azərbaycan Universitetinin yaradılması ilə bağlı görülən işlərdən bəhs etmiş, humanitar əlaqələrin genişləndirilməsinin digər sahələrə təsirini yüksək dəyərləndirmişdir.
Görüşdə öz ərazisini bərpa edən Azərbaycanın dağılmış şəhər və kəndlərində quruculuq işlərinə başlanıldığını bildirən dövlət başçımız vurğulamışdır ki, bu sahədə dost ölkələrin şirkətlərinin iştirakı nəzərdə tutulmuşdur. «Mən çox istərdim ki, İtaliya şirkətləri bu işlərdə, yəni bərpa, yenidənqurma işlərində fəal iştirak etsinlər. Bizim üçün də bu müharibə, eyni zamanda onu göstərdi ki, Azərbaycanın əsl dostları kimlərdir, hansı ölkələrdir. Biz dostluğu qiymətləndirən xalqıq. Sizin Azərbaycana səfəriniz bir daha onu göstərir ki, İtaliya doğrudan da Azərbaycanın əsl dostudur.»
Qonaqlar adından çıxış edən Ettore Rosato hər iki xalq arasında illərdən bəri davam edən dostluğun qarşılıqlı etimad və hörmətə əsaslandığını bildirərək qeyd etmişdir ki, belə əhəmiyyətli dövrdə bizim Azərbaycana səfərimiz dostluğun ifadəsidir. Qarşılıqlı səfərlərin, imzalanan sənədlərin İtaliya-Azərbaycan münasibətlərinə yeni nəfəs gətirdiyini və strateji əhəmiyyət daşıdığını bildirən Ettore Rosato səmimi duyğularını bu sözlərlə ifadə etmişdir: «Əslində bunlar elə sazişlərdir ki, onlarda çox konkret öhdəliklər və olduqca vacib mahiyyət əks olunubdur.»
Azərbaycan İtaliya üçün enerji daşıyıcılarının ilk ixracatçısıdır. Azərbaycanın təşəbbüsü ilə reallaşan qlobal enerji layihələrindən bəhrələnən digər Avropa ölkələri kimi, İtaliya da Cənub Qaz Dəhlizinin qitə dövlətləri üçün əhəmiyyətini yüksək dəyərləndirir və dəstəkləyir. «Belə keşməkeşli vaxtlarda enerji təzlükəsizliyni etimad göstərib o ölkəyə həvalə edə bilirik ki, o ölkə ilə həqiqətən dostluq münasibətləri olsun» söyləyən Ettore Resatonun bu sözləri, neft-qaz kəmərlərinin İtaliyaya çatdırılması iqtisadi əlaqələrin ən parlaq nümunəsidir.
Dünya dövlətlərinin ən çox ziyan gördüyü COVID-19 pandemiyasından zərər görən ölkələrdən olan İtaliyaya tibbi avadanlıqlarla, dərman preparatları, qoruyucu vasitələrlə yardımlar göstərən Azərbaycan bu sahədə də etibarlı tərəfdaş, əməkdaşlığın dostluq səviyyəsində olduğunu göstərir. Venesiyadan keçən tarixi İpək Yolu da hər iki ölkəni birləşdirən dostluq körpüsüdür.
Qonaqların erməni faşizminin eybəcər mahiyyətini, vandalizmini, barbarlığını göstərən Gəncəyə, Ağdama səfərlərinə toxunan Prezident İlham Əliyev italiyalı deputatlara Ermənistan dövlətinin törətdiyi hərbi cinayətlər haqqında da məlumat vermişdir: «Döyüş meydanında məğlubiyyətə uğrayarkən Ermənistan mülki vətəndaşları atəşə tutub. Gəncəni Ermənistan ərazisindən ballistik raketlərlə atəşə tutmuşdur. Bu hərbi cinayətdir və bu cinayətə görə Ermənistan rəhbərliyi cavab verəcək.» Qeyd olunmuşdur ki, müharibə zamanı 94 mülki şəxs həlak olmuş, 400-dən çox insan yaralanmışdır.
İtaliyalı deputatlar Gəncə və Ağdama səfərləri zamanı gördükləri viranəlikləri, erməni vəhşiliyini bu sözlərlə ifadə etdilər: «Hətta inanmaq belə çətin idi ki, burada nə zamansa insanlar yaşayıb.» Xarici ölkələri təmsil edən diplomatlar, xarici jurnalistlər kimi, italiyalı qonaqlar da etiraf etmişlər ki, gördüklərimiz dəhşətli müharibənin Azərbaycana vurduğu yara, insanlığa ləkə olan cinayətdir.
Xuraman İsmayılqızı, «İki sahil»
