Əhdimizə əməl etmək zamanıdı…
Azərbaycan Respublikası Prezidentinin 18 dekabr 2020-ci il tarixli Sərəncamı ilə “Cəsur döyüşçü” medalı ilə təltif edilən qazimiz Əhəd Həmidli Şuşa uğrunda döyüşlərdə ağır yaralanan iki silah yoldaşını döyüş meydanından çıxararkən özü də qolundan və ayağından qəlpə yarası alıb. Müalicə aldığı hospitalda sağalandan sonra İkinci Fəxri xiyabanda dəfn olunan şəhidlərin məzarlarını bir-bir ziyarət etməyi əhd eləmişdi. Bugünlərdə qazimiz bu müqəddəs məkanda ziyarətə Azərbaycanın Milli Qəhrəmanı general –mayor Polad Həşimovun məzarından başladı.
Tovuz hadisələrindən sonra könüllü olaraq orduya yazılan Əhəd Həmidli erməni faşistlərinə qarşı Azərbaycan Silahlı Qüvvələrinin apardığı ədalətli Vətən müharibəsində ilk gündən iştirak edib. Ordumuzun cəbhəboyu əks-hücum əməliyyatında erməni faşistlərinə sarsıdıcı zərbələr endirməsi və ilk uğurları bütün əsgərlər kimi onun da qələbə əzmini artırırdı. Əhəd Bəhrəm oğlu Həmidli 3 il əvvəl Tərtər bölgəsində ön cəbhədə hərbi xidmət etmişdi. Xidmət zamanı qazandığı təcrübə döyüşdə onun çox karına gəldi. Qatıldığı hərbi birləşmə Füzuli şəhərinin azad olunması uğrunda döyüşlərdə möhtəşəm qələbə qazandı, sonra Cəbrayıl, Zəngilan, Qubadlı rayonlarını işğalçılardan təmizlədi. Azad olunan torpaqlarımızda dalğalanan üçrəngli bayrağımız irəlidə qazanılacaq böyük qələbədən soraq verirdi. Ali Baş Komandanın qətiyyətli çıxışları hər gün, hər an əsgərlərdə qələbəyə inam, ümid yaradırdı.
Qarşıda isə Böyük Çin səddi qədər qüdrətli, əzəmətli məbəd kimi görünən qədim Şuşa və onu 28 ildən çox özünün yırtıcı, murdar caynağında saxlayan qaniçən erməni faşistləri vardı. Nəhayət, Azərbaycan xalqının və xilaskar ordumuzun səbirsizliklə gözlədiyi tarixi gün yetişdi, Qarabağın incisi Şuşa uğrunda hərbi əməliyyat başladı. İgid Azərbaycan əsgərləri peşəkar hərbçilərinin rəhbərliyi altında Şuşa şəhərini düşməndən azad etmək üçün mətinliklə döyüşürdülər. Xilaskar ordumuz payızı qızılı don kimi əyninə geyib yüksəklikdə məğrurcasına dayanan şəhərə can atırdılar. Əhəd Həmidlinin ən böyük arzusu Şuşaya qələbə bayrağı sancan və Ali Baş Komandana qələbə raportu verən Azərbaycan əsgərinin cərgəsində yer almaq idi. Qanlı – qadalı müharibə isə qara əjdaha kimi əsgərləri bir-bir udurdu. Ən çox itki verən də erməni-daşnak faşistləri idi. Həlledici döyüşlər zamanı Əhədlə çiyin-çiyinə döyüşən iki silahdaşı ağır yaralandı. Onları döyüş meydanından çıxararkən özü də yaralanan Əhəd ertəsi gün gözlərini xəstəxanada açdı.
…Noyabrın 8-i Azərbaycan tarixinə yazılan qürur günümüz olaraq yaddaşlara həkk edildi. Müzəffər Ordumuz Şuşada üçrəngli bayrağımızı dalğalandırdılar. O gün Ali Baş Komandan xalqa növbəti müraciətində iyirmi səkkiz il yarım işğal altında olan Şuşanın azad edilməsi xəbərini açıqlayanda dedi: “Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik! Şuşa bizimdir! Qarabağ bizimdir! Qarabağ Azərbaycandır!”
“Cəsur döyüşçü” medalı ilə təltif edilən qazimiz Şuşa uğrunda döyüşlərdən söz düşəndə deyir: “Şuşanın düşmən işğalından azad edilməsi möhtəşəm tarixi qələbəmiz olmaqla yanaşı, dünya hərb tarixində ən unikal örnəkdir. Şanlı ordumuzun Şuşa şəhərində həyata keçirdiyi azadetmə əməliyyatı hələ uzun illər dünyanın marağında olacaqdır…”
Nurəddin Muğanlı, “İki sahil”
