Ağsuda ilin ilk iki ayı heyvandarlar üçün uğurlu olub
Ağsu rayonunda heyvandarlıq məhsulları istehsalında dinamik artım davam edir. Cari ilin ötən ilk iki ayı da heyvandarlar üçün uğurlu olub.
Rayon statistika idarəsindən bu barədə AZƏRTAC-ın bölgə müxbirinə verilən məlumatda bildirilir ki, 2022-ci ilin ötən iki ayında diri çəkidə 810 ton ət istehsal olunub. Bu, keçən ilin müvafiq dövrü ilə müqayisədə 8 ton çoxdur. Süd və yumurta istehsalında da artım var. Belə ki, süd istehsalı 30 ton artıb və 4563 tona, yumurta istehsalı isə 42 min ədəd çoxalıb və 2 milyon 694 min ədədə çatıb.
Qeyd edək ki, heyvandarlıq rayonda kənd təsərrüfatının aparıcı sahələrindəndir. Hazırda bölgədə 38 min 644 baş iribuynuzlu mal-qara, 135 min baş davar, 241 min baş quş bəslənilir.
