Sülhə, qarşılıqlı əməkdaşlığa xidmət edən xarici siyasətimiz dəyişilməz və birmənalıdır
Prezident İlham Əliyevin sədrliyi ilə bu ilin birinci rübünün yekunlarına həsr olunan müşavirədə ölkəmizin siyasi, iqtisadi uğurları ilə yanaşı, diplomatiyada qazanılan uğurlardan bəhs edən dövlət başçımızın vurğuladığı kimi, beynəlxalq ictimaiyyətin Azərbaycanın bölgədə yaratdığı reallıqları dəstəkləməsi ölkəmizə artan marağın, inam və etimadın ifadəsidir
Ümummilli lider Heydər Əliyevin «Ona özüm qədər inanıram və gələcəyinə böyük ümidlər bəsləyirəm» sözlərini 18 illik fəaliyyəti ilə doğruldan, dövlət quruculuğu və idarəçilik sahəsində Azərbaycanın tarixinə yeniliklər gətirən, ilk dəfə Prezident seçilərkən söylədiyi «Əsl siyasət konkret, real iş görməkdən ibarətdir» vədini «Mən hər bir Azərbaycan vətəndaşının Prezidenti olacağam, hər bir Azərbaycan vətəndaşının qayğı və problemlərinin həlli yolunda bütün bacarıq və qabiliyyətimi əsirgəməyəcəyəm”» sözləri ilə reallaşdıran Prezident İlham Əliyev regionların iqtisadi inkişafı və aqrar islahatların ikinci mərhələsi ilə bağlı Dövlət proqramlarının hazırlanıb həyata keçirilməsi ilə dinamik inkişafı sürətləndirdi. Ölkəmizdə 2018-ci il 11 aprel tarixində keçirilən prezident seçkilərində cənab İlham Əliyevin seçicilərin 86,03%-nin səsini qazanaraq növbəti dəfə dövlət başçısı seçilməsi Azərbaycanda xalq-iqtidar birliyinin, milli həmrəyliyin nümunəsi olmaqla ulu öndər Heydər Əliyevin siyasi irsinə sadiqlik nümunəsi idi.
Ölkəmizdə bütün istiqamətlər üzrə davamlı inkişaf üçün lazımi konturlar müdrikcəsinə müəyyənləşdirildi, nəzərəçarpacaq nailiyyətlər qazanıldı. Azərbaycanın ərazi bütövlüyünün bərpasını təmin edən müstəqil xarici siyasət kursu beynəlxalq qanunların tələblərinə uyğun formalaşdırıldı, diplomatik səylər artırıldı. Azərbaycanın dünya iqtisadiyyatına , Avropa strukturlarına inteqrasiyanın intensivləşməsi ilə islahatlar paketi zənginləşdirildi.
Düşünülmüş daxili və xarici siyasət sayəsində Azərbaycan hətta dünya iqtisadi-maliyyə böhranı illərində belə analoqu olmayan, sistemli və davamlı xarakter alan inkişaf tempini qorudu. Bütün sahələr üzrə inkişafın keyfiyyətcə yeni mərhələsinin startı verilən Azərbaycanın gələcəyə yolunun bələdçisi «Tərəqqi, təkamül və yeni şəraitə uyğunlaşma» prinsipini əks etdirən təkamül oldu. 18 ildə həyata keçirdiyi uğurlu daxili siyasət nəticə etibarilə Azərbaycanın beynəlxalq aləmdə mövqelərinin möhkəmlənməsini təmin etməklə milli dövlətçilik maraqlarına uyğun ikitərəfli və çoxtərəfli əməkdaşlıq formatının müəllifi olan ölkəmizin xarici siyasəti qarşıdakı on illər üçün nəzərdə tutulan prioritetlər əsasında fomalaşdırıldı. Dövlət başçıları arasında böyük nüfuz qazanan Prezident İlham Əliyev beynəlxalq siyasətin aktoru statusuna yüksəldi.
Ölkə daxilində sabitlik yaratmaqla böyük iqtisadi uğurlara nail olan dövlət başçımız xarici siyasət kursunu dünyada baş verən hadisələr fonunda formalaşdırmaqla daha da təkmilləşdirdi. Zəngin dövlətçilik təcrübəsi, hadisələrin təhlili və araşdırılması baxımından həmkarlarından fərqlənən Prezident İlham Əliyev şahmat dili ilə desək, həmişə ağ fiqurlarla oynayan lider imicini gərgin fəaliyyəti ilə qazandı. Milli maraqları əks etdirən, zərgər dəqiqliyi ilə müəyyənləşdirilən, addım-addım irəliyə doğru istiqamətlənən diplomatik uğurları ilə Azərbaycana böyük nüfuz qazandıran cənab İlham Əliyevin dövlətçilik təcrübəsinin nəticəsidir ki, dünya siyasətinin ən qlobal, beynəlxalq əhəmiyyətli məsələlərinin müzakirəsi, mühüm simpoziumlar Azərbaycanda keçirilir. Avropanın enerji təhlükəsizliyinin təminatı istiqamətində çoxkombinasiyalı siyasi gedişlərin yaratdığı reallığı görən qitə dövlətləri ölkəmizə alternativi olmayan enerji mənbəyi kimi üstünlük verir. Ölkəmizdə mövcud olan daxili sabitlik, artan iqtisadi gücümüz, beynəlxalq sferada möhkəmlənən mövqeyimiz, davam etdirilən prinsipial xarici siyasətimiz bütünlükdə Azərbaycanın qüdrətli dövlət kimi tanınmasının məntiqi nəticəsidir. Ən böyük uğurumuz isə məqsədyönlü xarici siyasətimiz sayəsində 30 il Ermənistanın işğalı altında qalan ərazilərimizin azad edilməsidir.
Bu günlərdə Prezident İlham Əliyevin sədrliyi ilə bu ilin birinci rübünün yekunlarına həsr olunan müşavirədə ölkəmizin siyasi, iqtisadi uğurları ilə birgə diplomatiyada qazanılan uğurlardan da ətraflı danışıldı.
Vətən müharibəsini Zəfərlə başa çatdıran Azərbaycanla əlaqələrin möhkəmlənməsi, işğaldan azad edilmiş ərazilərimizdə aparılan bərpa-quruculuq işlərində iştirakla bağlı Türkiyə, İsrail və digər başqa dövlətlər tərəfindən müraciətlərin artması xarici siyasətində qarşılıqlı etimada böyük dəyər verən respublikamızın vədinə sadiq ölkə kimi tanınmasıdır.
İkinci Qarabağ müharibəsindən sonra beynəlxalq təşkilatların nümayəndələrinin, diplomatik korpus təmsilçilərinin, xarici jurnalistlərin ölkəmizə davamlı səfərləri Azərbaycan diplomatiyasının uğurlarının təzahürüdür. Vətən müharibəsindən sonra Azərbaycanla Türkiyə arasında imzalanan Şuşa, Türkiyə-Azərbaycan-Pakistan parlament sədrlərinin imzaladıqları Bakı bəyannamələri, Füzuli Beynəlxalq Hava Limanının, Zəfər yolunun istifadəyə verilməsi, işğaldan azad olunmuş ərazilərdə aparılan bərpa işlərində İtaliyanın, Türkiyənin tanınmış şirkətlərinin iştirakı ölkəmizin çoxşaxəli beynəlxalq münasibətlər sistemində özünü doğrultması, əməkdaşlıq coğrafiyasının genişlənməsidir.
«Biz, ilk növbədə, beynəlxalq təşkilatlarla öz təmaslarımızı, fəal əməkdaşlığımızı davam etdirmişik və dünyanın aparıcı beynəlxalq təşkilatları yeni reallıqları qəbul etmişlər. İlk növbədə, BMT xətti ilə Şuşa şəhərində bu yaxınlarda beynəlxalq tədbir keçirilmişdir – Azərbaycanın BMT-yə üzvlüyünün 30 illiyinə həsr edilmiş tədbir. Bu, çox əlamətdar hadisə idi. Bu, bir daha onu göstərdi ki, BMT Azərbaycanın ərazi bütövlüyünü tam tanıyan qurumdur» söyləyən Prezident İlham Əliyev Azərbaycanın digər aparıcı beynəlxalq təşkilatlardakı fəaliyyətini də diplomatiyada qazanılan uğur adlandırır. BMT-dən sonra ən böyük beynəlxalq təsisat olan Qoşulmama Hərəkatına sədrlik edən Azərbaycanın quruma üzv dövlətlərin razılığı və dəstəyi ilə sədrlik müddətinin daha bir il uzadılması ölkəmizin özünü doğruldan xarici siyasətinə beynəlxalq səviyyədə göstərilən dəstək və etimaddır. İkinci Qarabağ müharibəsinin davam etdiyi müddətdə İslam Əməkdaşlıq Təşkilatının rəsmi olaraq Azərbaycanın ədalətli mövqeyini dəstəkləyən qərar və qətnamələr qəbul etməsi, eyni zamanda, ölkəmizin multikultural, tolerantlıq dəyərlərə sadiqliyidir. «Bu yaxınlarda İslam Əməkdaşlıq Təşkilatının xarici işlər nazirləri səviyyəsindəki toplantıda bir daha bir neçə qətnamə – Azərbaycan mövqeyini dəstəkləyən, o cümlədən Azərbaycanın tarixi-dini abidələrinin ermənilər tərəfindən dağıdılmasına dair önəmli qərar-qətnamələr qəbul etmişdir və təşkilatın rəhbərliyi azad edilmiş torpaqlara səfərlər etmişlər» söyləyən dövlət başçımız İlham Əliyev uzun müddət artıq tarixə qovuşan «Dağlıq Qarabağ münaqişəsi»nin həlli ilə guya məşğul olmaq görüntüsü formalaşdıran ATƏT-in Minsk qrupunun fəaliyyəti ilə bağlı münasibətini açıqlamışdır. Ən əsası odur ki, 30 ilə yaxın müddətdə Azərbaycana qarşı ikili stndartlar mövqeyindən yanaşan digər beynəlxalq təşkilatlar kimi, ATƏT rəsmiləri də ölkəmizin bölgədə yaratdığı reallıqları qəbul edir. «ATƏT-in Minsk qrupuna gəldikdə, müharibədən dərhal sonra Minsk qrupunun həmsədrləri Bakıya gəlmişdilər. Bu, onların Azərbaycana müharibədən sonra birinci və sonuncu səfəri idi və o görüşlə bağlı mətbuatda kifayət qədər məlumat var, təkrar etmək istəmirəm. Bizim mövqeyimiz həmişə birmənalı olub. Biz müzakirə zamanı nəyi demişiksə, rəsmi açıqlamalarda da eyni tezisləri, eyni fikirləri səsləndirmişik. Biz bu münaqişəni özümüz həll etdik. Minsk qrupu İkinci Qarabağ müharibəsinə qədər 28 il fəaliyyətdə idi və həmsədr ölkələr bu illər ərzində Azərbaycana, Ermənistana bəlkə də yüzlərlə səfər etmişlər. Nəticə də göz qabağındadır, nəticə sıfır. Bunun səbəbləri də Azərbaycan ictimaiyyətinə məlumdur» söyləyən Prezident İlham Əliyev Azərbaycanın illərdən bəri dünya siyasətinin aktual və qlobal məsələsi olan «Dağlıq Qarabağ münaqişəsi»ni öz gücü, qüdrəti ilə həll etməsini ölkəmizin diplomatik uğuru adlandırır. Minsk qrupuna münaqişənin həlli üçün verilmiş mandatı faktiki olaraq de-yure qüvvədə olsa da, de-fakto artıq etibarsız hesab edən Prezident İlham Əliyev Minsk qrupunun həmsədrlərinin fəaliyyətsizliyini dəfələrlə bildirmişdir. Müşavirədə söylədiyi «Siz nə ilə məşğul olmaq istəyirsiniz, deyin, biz də bilək və öz fikrimizi bildirək. Bir ildən çox müddətdə bu məsələ ilə bağlı bizə hər hansı bir təklif verilməmişdir. İndiki şəraitdə isə Minsk qrupu, onun həmsədrlər formatı faktiki olaraq qeyri-funksional vəziyyətdədir. Bunu artıq bu həmsədr ölkələrin yüksəkvəzifəli şəxsləri bildirirlər və belə olan halda, əlbəttə ki, hər hansı bir qrup şəklində fəaliyyətdən söhbət gedə bilməz. Hesab edirəm ki, ATƏT bir mötəbər beynəlxalq təşkilat kimi öz rolunu oynaya bilər. Bu yaxınlarda qeyd etdiyim kimi, ATƏT-in fəaliyyətdə olan sədri ilə görüşlər əsnasında mən bildirmişdim ki, vətəndaş cəmiyyətinin nümayəndələri, media nümayəndələri, digər ictimai rəyə nüfuz, yəni təsir edə bilən şəxslər ATƏT-in fəaliyyəti çərçivəsində, yəni ki, bu format çərçivəsində görüşlər keçirə bilərlər ki, Ermənistan-Azərbaycan əlaqələri normallaşsın» sözləri ilə hazırda aktual məsələ olan Ermənistanla Azərbaycan arasında etibarlı sülhün yaranmasında istənilən beynəlxalq təşkilatın öz töhfəsini verə biləcəyini də diqqətə çatdırır.
Son illərdə Avropa İttifaqı ilə Azərbaycan arasında möhkəmlənən təmasların müsbət nəticəsi bu günlərdə keçirilən Brüssel görüşündə razılaşdırılan prinsiplər, Azərbaycana olan isti münasibətlərdir. «Avropa İttifaqı da postmünaqişə dövrünün reallıqlarını qəbul etmişdir. Avropa İttifaqı Şurasının Prezidenti cənab Şarl Mişelin təşəbbüsü ilə dekabr və aprel aylarında üçtərəfli görüşlər keçirilmişdir. Görüşlər haqqında məlumat verilmişdir, bu məsələ ilə əlaqədar çox da danışmaq istəmirəm. Ancaq, əlbəttə ki, həm ekspertlər, həm Azərbaycan ictimaiyyəti gördülər ki, yekun kommunikedə «Dağlıq Qarabağ»” adı yoxdur, bu da təbiidir. Çünki Azərbaycan buna etiraz etmişdir və «münaqişə»” sözü də yoxdur. Bu da təbiidir, çünki münaqişə yoxdur» sözlərinin məntiqi nəticəsi Azərbaycanın öz gücü ilə ərazi bütövlüyünü bərpa etməsi, Ermənistana ikitərəfli münasibətlərin tənzimlənməsini təmin edəcək , sülhün yaranmasına yönələn 5 prinsipdən ibarət təklif verməsidir. «Brüssel görüşündə isə mən bunu özüm üçün, sadəcə olaraq, daha da yəni, aydınlaşdırmaq istəyirdim və aydınlaşdırdım ki, Ermənistan 5 prinsipi qəbul edir. Beləliklə, Azərbaycanın ərazi bütövlüyü qəbul edilir və Ermənistan Azərbaycana ərazi iddiasından əl çəkir» söyləyən ölkə Prezidenti İlham Əliyev Aİ-də keçirilən görüşü, bu günlərdə Azərbaycanla Ermənistan xarici işlər nazirləri arasındakı telefon söhbətini də müsbət hal kimi qiymətləndirir. Sərhədlərin delimitasiyası ilə bağlı aprelin sonuna qədər formalaşdırılacaq, sülh müqaviləsinin hazırlanması ilə məşğul olacaq işçi qruplarının işə başlamasını ölkəmizin diplomatik səylərinin uğurlu nəticələri adlandırır.
Azərbaycanın işğaldan azad edilmiş ərazilərində apardığı quruculuq işlərinin dəstəklənməsi, beynəlxalq təşkilatlarla ikitərəfli formatda əlaqələrin yeni istiqamətdə formalaşması, Qarabağ və Şərqi Zəngəzurdakı inkişaf, nəqliyyat-kommunikasiya layihələrinin həyata keçirilməsi kimi reallıqlar təsdiqləyir ki, ölkəmiz təkcə regionda deyil, bütün dünyada söz sahibidir.
