Baş tutmayan Malta görüşü: Ermənistan ikitərəfli görüşdən niyə qaçdı?
Maltada keçirilməsi planlaşdırılan Azərbaycan və Ermənistan xarici işlər nazirlərinin üçtərəfli görüşü ABŞ dövlət katibi Entoni Blinkenin təşəbbüsü ilə təşkil edilməli idi. Lakin Azərbaycan bu görüşdən imtina etdi. Səbəb kimi Bayden hakimiyyətinin son zamanlar Azərbaycanın maraqlarına qarşı ermənipərəst mövqe sərgiləməsi və qərəzli siyasət apardığı göstərildi.
Sual olunur ki, Ermənistan tərəfi niyə ikitərəfli danışıqlara deyil, üçtərəfli danışıqlara razı olub?
Hətta yaxınlarda Rusiyada İlham Əliyevlə Nikol Paşinyan arasında baş tutan görüşdə belə Putinin, ya da hansısa digər Rusiya rəsmisinin iştirakı olmadı. Bəs niyə Ermənistan tərəfi Qərb liderlərinin vasitəçiliyi ilə görüşlərə maraqlıdır, nəinki ikitərəfi danışıqlara?
Sabiq maliyyə naziri, professor Fikrət Yusifov mövzu ilə bağlı Musavat.com-a fikirlərini bölüşüb:
“Qarabağ probleminin yaradıldığı ilk gündən Azərbaycanın deyil, Ermənistanın yanında dayanan, işğal altında saxlanılan torpaqlarımızda ermənilərin törətdikləri vəhşiliklərə, terrora göz yuman heç kimin haqqı yoxdur ki, 44 günlük müharibədəki qələbədən və bir günlük antiterror tədbirlərindən sonra Azərbaycana sülh müqaviləsi ilə bağlı nəyi, necə etmək təklifi versin.
Lakin artıq 4 ildən çoxdur ki, ABŞ və bütövlükdə Qərb öz siyasi ambisiyalarından əl çəkə bilmir. Azərbaycanla Ermənistan arasında sülh müqaviləsinin bağlanması üzrə danışıqların onların iştirakı ilə keçirilməsini təkidlə təklif edirlər. Bunlar anlamalıdılar ki, bu gün sülh 44 günlük müharibədə ağır məğlubiyyət yaşamış Ermənistana daha çox lazımdır. Əgər Ermənistan gerçəkdən sülh istəyirsə, o halda Azərbaycanla birbaşa danışıqlara getməli və məğlub ölkə kimi onun şərtlərini qəbul etməlidir. Bunun alternativi yoxdur”.
Professor əlavə edib ki, hakimiyyət kürsüsündən getmələrinə bir aydan bir qədər artıq vaxtın qalmasına baxmayaraq, blinkenlər yenə də Azərbaycanın daxili işlərinə burun soxmaqdan özlərini saxlaya bilmirlər:
“Bayden hökuməti 4 il ərzində Azərbaycana qarşı ədalətsiz bir mövqedən çıxış etdi, 22 ildən sonra məşhur 907-ci düzəlişin tətbiqinin ABŞ prezidentləri tərəfindən hər il aradan qaldırılmasına son verdi və Azərbaycana qarşı erməni lobbisinin təhriki ilə qəbul edilmiş bu qadağanı yenidən bərpa etdi. Biz belə bir münasibət fonunda bu hökumətin təklifini rədd etməkdə tam haqlıyıq”.
