Ət niyə bahalaşır? Statistikalar təhlükəli tendensiyanı göstərir
“Ət bazarında qiymət artımı sürətlənir. Bu bahalaşmanın əsas səbəbləri arasında ölkədə saxlanılan heyvanların sayının azalması və ətə olan tələbatın artması göstərilir. Son 10 ilin statistikası göstərir ki, xırdabuynuzlu heyvanların sayı təxminən 20 faiz azalıb, iribuynuzlu heyvanlarda da oxşar azalma müşahidə olunur”.
Bunu BiG.AZ-a açıqlamasında iqtisadçı Xalid Kərimov bildirib.
O, qeyd edib ki, , əhəlinin ətə olan tələbatı 25 faiz artıb. Nəticədə tədarük və tələbat arasındakı fərq bazarda qiymətlərin davamlı şəkildə yüksəlməsinə səbəb olur:
“Heyvandarlıqla məşğul olanların sayında azalma da diqqətçəkəndir. Bu azalmanın səbəbləri arasında boş otlaq sahələrinin azalması, yem xərclərinin bahalaşması və heyvan saxlamağın çətinləşməsi dayanır.
Əvvəllər qiymət artımını müəyyən qədər tənzimləyən idxal mexanizmi də artıq eyni effekti vermir. Ukrayna və digər regionlardan gətirilən ucuz ət məhsulları bazarda mühüm rol oynayırdı. Lakin Rusiya–Ukrayna müharibəsi və qlobal bazarlarda baş verən dəyişikliklər bu balansı pozub”.
İqtisadçı hesab edir ki, bütün bu amillər fonunda ət qiymətlərində artımın yaxın aylarda da davam edəcəyi gözlənilir. Bununla belə, bazarda yeni sahibkarların marağının artması, heyvandarlığın yenidən cəlbedici sahəyə çevrilməsi gələcəkdə daxili istehsalın artmasına ümid yaradır.
